“Guyyaan Sabootaa, Sablammootaafi Uummattoota Itoophiyaa tokkummaa lammiilee jidduu ture cimsaa jira” jedhan Obbo Aganyew Tashaagar.
Simpooziyeemiin Guyyaa Saboota, Sablammootaafi Uummattoota Itiyoophiyaa 20ffaan Naannoo Giddugaleessa Itiyoophiyaa Magaalaa Hoosaanaatti taa’amaa jira.
Af-Yaa’iin Mana Maree Federeeshinii Obbo Ageenyew Tashaagar, Guyyaa Saboota,Sablammootaafi Uummattoota Itiyoophiyaa kabajamuun Waloomaafi Tokkummaa cimsuun guddinaafi birmadummaa Itoophiyaaf akka dhaabbatan taasisaa jira jedhaniiru.
Ayyaanichi barii eebba Hidha Haaroomsa Guddicha Itoophiyaafi Piroojektootni gurguddoon yeroo itti eegalamanitti kabajamuun adda akka taasisu himan.
Waggoottan 19’n darban ayyaanni sabootaa, Sablammootaafi Uummattoota Itiyoophiyaa kabajame hariiroo lammiileen Itiyoophiyaa jiddu tures daran kan cimse ta’uus dubbatan Obbo Aganyew.
Af-yaa’iin Mana Maree Naannoo Giddugaleessa Itoophiyaa Aadde Faaxee Sarmooloo,Guyyaan Saboota, Sablammootaafi Uummattoota Itiyoophiyaa Guyyaa heerri itti ragga’uun sabootaaf mirga wal qixxummaa goonfachiise ta’u ibsaniiru.
”Agarsiiftun kanaa ammoo Naannoon Giddugaleessa Itoophiyaa hundeeffamuun mirga wal qixxummaa sabootaa kan mirkaneesseefi gaaffii ka’aa ture kan deebiseedha” jedhan.
Guddataa Ajjamaatu gabaase
