Biiroon Misooma Indastirii Magaalaa Finfinnee teekinooloojii haaraa kenna tajaajilaa fooyyessuuf oolu ifoomseera.
Teekinooloojiin kun walta’iinsa Biiroo Innoveeshiniifi Teekinoolojii Magaalattiin akka misoome ibsameera.
Kantiibaa Itti Aanaafi Hogganaan Biirichaa Obbo Jaanxiraar Abbaay, teekinooloojiin ifoome karoora kenna tajaajilaa haqa qabeessa ta’e diriirsuuf qabame milkeessuuf kan gumaachu ta’uu dubbatan.
Teekinooloojiin marsariitii hojichaaf oolu of keessatti qabate kun dadammaqiinsa damee induustiriif faayidaa guddaa kan qabaatu ta’uu kaasan.
Humna namaa kan qusatuufi hordoffiifi to’annoof kan tolu tekinoolojiin haaraan misoome iftoomina odeeffannoo kan mirkaneessu ta’uus Obbo Jaanxiraar himaniiru.
Hogganaan Biiroo Tekinoolojiifi Innoveeshinii Magaalaa Finfinnee Obbo Awwal Mohaammad gamasaaniin, hojimaata badaa hir’isuuf kan oolu tekinoolojiin haaraan ifoome tajaajiloota gurguddoo 18 of keessatti kan qabate ta’uu dubbataniiru.
Bulchaa Nagaraatu gabaase
