AMN PLUS- Onkoloolessa 15/2018
Kantiibaan Bulchiinsa Magaalaa Finfinnee Adaanach Misooma Koriidarii Saarbeeti-Addabaabaayii Jarmanii-Gaarmantii Furiitti fulla’u eebbifamee tajaajilaaf banaa tahuu ibsaniiru.
Sirna eebbaa irratti Ministirri Muummee Abiyyi Ahimad(PhD) fi miseensotni Koree hojii raawwachiiftuu Paartii Badhaadhinaa argamuu beeksisaniiru.
Kantiibaa Adaanach “Waaqa nu gargaareef galatni haa ta’u” jechuun miidiyaa hawaasummaa isaanii irratti kan ergaa dabarsan yoo tahu, uummata amanamummaafi qajeelummaan waadaa seenaniif tokko lama jedhanii tajaajilaa jiraachuullee ibsaniiru.
Bu’uuraaleen Misoomaa hojjataman jiraattota magaalaaf mijachuurra darbee magaalaan Finfinnee Sadarkaa Idil addunyaatti akka dorgomtu taasisuu ibsaniiru.
Dabalataanis, carraa hojii kan lammiileef uumaniifi misooma waaraa mirkaneessuuf kan oolan tahuu kaasaniiru.
Kana irra darbees, magaalaa Ismaartii taasisuuf galma qabame milkeessuuf hojiin hojjatamu bu’uura tahuu kaasuun tuurizimiif galtee dabalataa tahuu irra darbee qulqullinaafi miidhagina Giddu gala godhachuun hojjatamuus ibsaniiru.
Koriidariin eebbifame kun marsaa 2ffaa kan jalqabame keessaa isa 6ffaa yoo tahu, Koriidarii Kaazaanchisitti aanee Isa dheeraafi bal’ina qabu, Lafa Heektaara 589 irratti kan misoome tahuu kaasaniiru.
Daandii Aspaaltii, daandii miilaa, Pilaazaawwan, Giddu gala Ispoortii, bakka tapha ijoollee, misooma qarqara laggeenii, dhaabbii konkolaataa, tarminaala, mana dhiqannaa, kaaffeefi resturaantii akkasumas tajaajiloota biroo akka qabu ibsaniiru.
Kantiibaa Adaanach, qaamolee milkaa’ina hojii kanaaf gumaachaniifi hawaasa Naannoo deggersa taasise hundumaa galateeffataniiru
