Teekinooloojiin Misooma Niwukilaraa Itoophiyaa tajaajila nagaaf qofa akka oolu Komishinarri Komishinii Anniisaa Niwukilaraa Itoophiyaa Sandookaan Dabbabaa ibsan.
Komishinarri Komishinii Anniisaa Niwukilaraa Itoophiyaa Sandookaan Dabbabaa, Teekinooloojiin Niwukilaraa Itoophiyaa nageenya anniisaa mirkaneessuun cehumsa diinagdeefi kaka’umsa misoomaa biyyaalessaa irratti akka xiyyeeffatu dubbataniiru.
Ministirri Muummee FDRI Abiyyi Ahimad (PhD) waltajjii humna atoomawaa idil-addunyaa Raashiyaatti gaggeeffamerratti Itiyoophiyaan misooma humna niwukilaraa naga qabeessaaf kutannoo qabaachuu ishee mirkaneessuu isaa yaadachiisaniiru.
Madda dhiyeessii anniisaa qulqullina qabu ol guddisuun damee fayyaa, qonnaafi indastirii akkasumas gama qorannoofi qo’annoon akka fayyadus Komishinar Sandookaan akeekaniiru.
Mariin Sagantaa jalqabsiisa Misooma Anniisaa Niwukilaraa fi Komishinii Anniisaa adeemsifame irratti komishinarichi, guddina diinagdee Itoophiyaa itti fufiinsa qabu mirkaneessuuf karoorfamuu isaa ibsaniiru.
Komishinichi aangoo kennameefiin Dhaabbata Anniisaa Niwukilaraa idil Addunyaa wajjin gama muuxannoo qooddachuu, leenjii teekinikaa fi ogeessotaan akka waliin hojjatu beeksisuu isaa TOI gabaaseera.
