AMN Plus – Onkoloolessa 13/2018
Manni Maree Ministirootaa raawwii diinagdee gooroo guyyootii 100 haalota diinagdee addunyaa waliin walbira qabee qorachaa jiraachuu Waajjirri Ministira Muummee beeksise.
Bara 2017tti guddinni diinagdee Waliigalaa 9.2% akka galmaa’e himameera.
Dameen qonnaa guddina 7.3%, industiriin 13%, dameen tajaajilaa ammoo 7.5% agarsiisuu eerameera.
Hojiilee jijjiiramaa hojjetamaa jiraniin, akkasumas hojiilee misoomaa ijoo mootummaa dabalatee carraawwan invastimantii haaraa dabalamaniin, bara 2018 guddinni waliigalaa %10.2 akka eegamu himameera.
Kanaaf ammoo hidhi haaromsaa gara hojiitti seenuun, warshaa gaazii uumamaa dabalatee jalqabbiin warshaa xaa’oo diinagdeen caalmaan akka dadamaqu taasisa jedhameera.
Qonni guddina 7.8%, industiriin 13.2% akka galmeessan eegama. Oomishni Warqii kan karoorfameen ol deemaa akka jiruu ibsameera.
Dameen tajaajilaas turizimii, geejjibaafi diinagdee diijitaalaan deeggaramee guddina 9.3% akka agarsiisu eegama.
Baatiiwwan sadan jalqabaatti daldala alaarraa galiin doolaarri biiliyoona 2.5 yoo argamu, sosochii faayinaansii diijitaalaan birriin tiriiliyoona 6.5 socho’uu eerame.
