AMN PLUS – Xoorrey 27/2018 T.I.
Ra’iisul Wasaare Abiy Axmed (PhD) ayaa sheegay in aqoonyahannadu ay door sare ka qaataan beddelidda aqoonta ay urursadeen una rogayaan ficil la taaban karo, isla markaana ay qaabeeyaan jiil dhisa dalka.
Isagoo ka hadlayay munaasabadda gabagabada dabaal-degga ee Jaamacadda Addis Ababa, Ra’iisul Wasaaruhu wuxuu sharaxay in aqoonyahannimada aan lagu cabbiri karin keydinta buugaagta ama tirada akhriska oo keliya, balse lagu garto dhalinta fikrado xal u ah dhibaatooyinka iyo horumarinta bulshada.
Ra’iisul Wasaaruhu wuxuu tusaale u soo qaatay saynisyahannad Marie Curie, oo 30 jir ahayd markii ay bixisay fasiraadda shucaaca ee beddeshay dunida. Wuxuu carrabka ku adkeeyay in haddii aan la abuurin jiil dhalinyaro ah oo fahma kana faa’iideysta tignoolajiyada, aan la dhalin karin fikrado wax ka beddela waqtiga iyo horumarka.
Wuxuu sheegay in astaanta aqoonyahannimada ay tahay ixtiraamka fikradda iyo jacaylka fikirka, isla markaana aqoonyahannadu ay noqdaan kuwo si qoto dheer u fakara, wax waydiin kara, falanqeeya, kana beddela aqoonta ficil wax ka tari kara nolosha bulshada.
Sidoo kale, Ra’iisul Wasaaruhu wuxuu xusay in aqoonyahannadu aysan kaliya mas’uul ka ahayn inay naftooda ka dhigaan kuwo saamayn leh, balse ay sidoo kale leeyihiin mas’uuliyadda ah inay abuuraan jiil mustaqbalka la wareegi doona dalka, isla markaana noqda mid saamayn leh.
Wuxuu adkeeyay in shaqada ugu weyn ee aqoonyahannadu tahay qaabaynta jiil waddani ah, adkaysi u leh imtixaannada, dalkana u shaqeeya isla markaana saameyn togan ku yeesha.
Ugu dambayn, wuxuu ku boorriyay aqoonyahannada inay horumariyaan fakar istiraatiiji ah iyo mid hal-abuur leh, isla markaana ay soo saaraan jiil saamayn leh oo xaqiijiya barwaaqada Itoobiya. Wuxuu sidoo kale ugu baaqay in aqoonyahannadu aysan kaliya ku dayanin khibradaha caalamiga ah sida ay yihiin, balse ay u beddelaan hab-dhaqan ku habboon dalka, iyaga oo beeraya abuurka aqoonta.
