የሚኒስትሮች ምክር ቤት በዛሬው ዕለት ባካሄደው 50ኛ መደበኛ ስብሰባ በሀገሪቱ ልማት ላይ ወሳኝ የሆኑ ውሳኔዎችን አሳልፏል። ከውሳኔዎቹ ዋንኛው የዲጂታል ኢትዮጵያ 2030 ስትራቴጂ በሙሉ ድምጽ ጸድቆ ተግባራዊ እንዲሆን መወሰኑ ነው። ስትራቴጂው የቴክኖሎጂ አቅምንና የመሰረተ ልማት ዝርጋታን በማስፋፋት የኢኮኖሚ ዕድገትን ለማፋጠን እና መልካም አስተዳደርን ለማስፈን ያለመ ነው።
ምክር ቤቱ ከዓለም አቀፍ የልማት ማህበር (IDA) ጋር የተፈረሙ ሁለት የፋይናንስ ድጋፍ ስምምነቶችን መርምሮ ለሕዝብ ተወካዮች ምክር ቤት እንዲተላለፉ ወስኗል። ስምምነቶቹ 294.9 ሚሊዮን ኤስ.ዲ.አር. ለዘላቂ እና ንፁህ ኢነርጂ እንዲሁም 20 ሚሊዮን ኤስ.ዲ.አር. ለምስራቅ አፍሪካ የክህሎት ትራንስፎርሜሽን ፕሮጀክት ማስፈጸሚያ የሚውሉ ናቸው። ሁለቱም ከወለድ ነጻ የሆኑ ብድሮች ሲሆኑ 0.75% የአገልግሎት ክፍያ የሚከፈልባቸው ናቸው፡፡
በተጨማሪም፣ ከሶስት አገሮች — ህዝባዊት ቻይና ሪፐብሊክ፣ ብራዚል ፌዴራላዊ ሪፐብሊክ እና ደቡብ አፍሪካ ሪፐብሊክ — ጋር የተደረጉ የወንጀል ጉዳዮች የጋራ የህግ ትብብርና ፍርደኞችን የማስተላለፍ ስምምነቶች ረቂቅ አዋጆች ለሕዝብ ተወካዮች ምክር ቤት እንዲቀርቡ ተወስኗል። እነዚህ ስምምነቶች ውጤታማ የወንጀል መከላከል የሁለትዮሽ ትብብር የሕግ ማዕቀፍ ለመፍጠር እንደሚያስችሉ ተገልጿል።
ምክር ቤቱ በተያያዘም የኤሌክትሮኒክ ፊርማ አዋጅን ሙሉ ለሙሉ ሥራ ላይ ለማዋል የሚያስችለውን የኤሌክትሮኒክ ፊርማ ረቂቅ ደንብ እንዲሁም የአካባቢ ጥበቃ ባለስልጣንና የኢትዮጵያ ብሄራዊ ቴአትር የአገልግሎት ክፍያዎችን የሚወስኑ ሁለት ረቂቅ ደንቦችን አጽድቋል።
