Qaamolee rakkoo nageenyaa uuman dursanii to’achuun bu’aan argame olaanaa akka ta’e Ajajaan Waliigalaa Qajeelcha Poolisii Magaalaa Finfinnee Komishinar Geetuu Argawu ibsan.
Nageenyaa fi tasgabbii Magaalaa Finfinnee eeguuf qaamoleen nageenyaa gahee olaanaa akka qabanis ibsaniiru.
Poolisiin Magaalaa Finfinnee riifoormii bu’a qabeessa taasisaa akka jiran kan ibsan Komishiinar Geetuun, “akaadaamiin poolisii gara koolleejiitti guddachuunisaa agarsiiftuu tokkodha” jedhan.
Dhaabbatichi hojimaata isaa teeknooloojiin deeggaruu fi hirmaannaa uummataa cimsuun yakka hir’isuun akka danda’ame eeruun, qaamolee rakkoo uumuf socho’on dursanii to’achuun bu’aa boonsaan akka argames ibsaniiru.
Komishiinar Geetuun Poolisoota dandeettiin gahoomsuuf wiirtuu leenjii Koolleejjii Poolisii sadarkaa kanaan qaamolee gahan galateeffataniiru.
Eebbifamtoonnis seera bu’uura taasifachuun hawaasa isaanii kutannoon tajaajilu akka qaban habachiisaniiru.
Qajelcha Waliigalaa Poolisii Itoophiyaatti Ajajaa Itti Aanaan Damee Ittisa Yakkaa Komishiinar Malaakuu Faantaa gamasaaniin miseensonni poolisii bakka itti bobba’anitti nagaa hawaasaa eeguun hojiin misooma akka itti fufuu taasisuu qabu jedhaniiru.
Carraa barnootaa Koolleejjii Poolisii keessatti argatan kana fayyadamuun nageenyaa fi tasgabbii magaalichaa eegsisuun akka barbaachiisus dubbataniiru.
Misooma Magaalaan Finfinnee hojjechaa jirtu kana sadarkaa fooyya’aan itti fufsiisuuf gaheen qaamolee nageenyaa murteessaa akka ta’es ibsaniiru.
