AMN PLUS – Amajjii 27/2018
Poolisiin Federaalaa buufata poolisii nam-maleessa (Smart Police Station) kutaa magaalaa Boolee aanaa 03 bakka addaa Ruwaandaa jedhamuun beekamuutti ijaarsisaa jiraachuu ibseera.
Buufatichi tajaajila barbaadamuuf banaa tahuuf gara xumuraatti kan dhiyaate yoo tahu hooggantootni olaanoo qajeelcha waliigalaa poolisii Finfinnee daawwataniiru.
Daawwannicharratti kan argaman ajajaan itti aanaa qajeelcha waliigalaa qorannoo yakkaafi balaa tiraafikaa poolisii Finfinnee komiishinarri itti aanaa Hasan Nagaash Finfinneen akkuma maqaa ishee miidhaguun deeggarsa teeknoloojiin yakka ittisurrattis hojjechaa jiraachuuf hojichi agarsiistuu tahuu ibsaniiru.
Komiishinarichi hojii yakka dursanii ittisuu Poolisiin Federaalaa hojjechaa jiru dinqisiifachuun akka fakkeenyaattis kanaan dura bifa hawaasaa hirmaachiiseen yakka ittisuuf kan tajaajilu moosaajii (Citizen Engagement Application) kalaquun hojitti galchuu yaadachiisaniiru.
Poolisiin Finfinnee buufataalee poolisii nam-maleeyyii deeggarsa teeknoloojiin tajaajilanitti dhimma bahuun hojii yakka ittisuu xiyyeeffannoon akka hojjetu kan ibsan komiishinar Hasan hojichi sadarkaa poolisii federaalaa irra jiru akeeka jedhaniiru.
Poolisii federaalaatti hoogganaan olaanaa kutaa oppireeshinii teeknoloojii Inispeektar Anteeneh Sisaay buufata poolisii nam-maleessa ijaaruuun hojii eegalchiisuuf xumura irra gahuu ibsuun kunis sadarkaa tajaajilli poolisiin kennamu irra gahee akka agarsiisuu heeruun lammiileen hundi tajaajila poolisii haala salphaan akka argatan taasisuuf qooda qabaan hubachiisaniiru.
Buufatni poolisii nam-maleessi Poolisii Federaalaa ijaaramaa jiru kun Afrikaa irraa kan jalqabaa akka Addunyaatti ammoo sadarkaa 4ffaadha kan jedhan Inispeektarichi namootni rakkoon irra gahe iyyata isaanii ofumaan giddu galicha deemun dhiyeeffachuun furmaata akka argachuu danda’an ibsuun hojii fakkeenyummaa qabu akkasii poolisiin Finfinnee kutaalee magaalatti hundatti akka babal’isu amantaa qabanillee ibsaniiru.
Hooggantootni olaanoo qajeelcha waliigalaa poolisii Finfinnee buufata poolisii nam-maleessa poolisii federaalaan ijaaramaa jiru daawwatan gama isaaniin yaada kennaniin muuxannoo hojii poolisiin wal qabatee akka Addunyaatti jiru gara Finfinneetti fiduun tajaajila tuttuqqaa irraa bilisa taheefi iftoomina qabu kennuu dabalatee amanamummaa hawaasni poolisii irraa qabu akka cimsullee ibsuu isaanii ragaan Poolisiin Finfinnee AMN’f erge ni mul’isa.
