Bara 2017’tti daldala mi’eessituu gabaa alaaf ergame irraa galiin Doolaara Miiliyoona 14fi Kuma 900 ol akka argame Abbaan Taayitaa Bunaafi Shaayee beeksiseera.
Abbaan Taayitichaa oomisha mi’eessituu toonii kuma 15 fi 612 gabaa alaaf dhiyaaterraa galiin kun argamuu ibseera.
Hoogganaan Deeskii Misooma Mi’eessituu Abbaa Taayitichaa Mogos Ashannaafii, oomishni mi’eessituu kun biyyoota Hindii, Ijipt, Saa’udii Arabiyaa, Ameerikaa, Kaanaadaa, Emereetota Arabaa Gamtoomanii, Yaman, Keeniyaa, Iraaq fi Paakistaanitti akka ergame dubbataniiru.
Akaakuuwwan mi’eessituu akka biyyaatti faayidaa qaban adda baasuun naannoleerraa odeeffannoowwan garagaraa walitti qabuu fi qindeessuun raawwatamuu ibsaniiru.
Mi’eessituuwwan baddaa keessaa abasuunni gurraacha, abasuuda adii, dimbilaala, abishii, midhaan Karaayizoomii keessaa jijimbila, Irdii, Barbaree, Kororimaa, qundo barbaree, eelii, fi urgooftuuwwan addaa addaa gabaa alaaf akka ergaman ibsaniiru.
Bara 2018’itti oomisha mi’eessituu toonii kuma 17 fi 194 gabaa alaaf erguun galii Doolaara miiliyoona 16 ol argachuuf karoorfachuu isaanii akka ibsan TOI’n gabaaseera.
