Warshaan xaa’oo damee qonnaa sirnaan deeggaruun imala Itoophiyaan badhaadhinaaf taasiftu mirkaneessuu keessatti gahee olaanaa akka qabu Biiliyeenarri Afriikaa Aliikoo Daangooteen ibsaniiru.
Ministirri Muummee Abiyyi Ahimad (Dr.) hooggansa mul’ata ti kan jedhan Daangooteen, qonna ammayyeessuuf hojii isaan hojjetaa jiran biyyattii badhaadhinatti akka ceesisu akeekan.
Hundeessaa fi Hojii Gaggeessaan Dhaabbata Daangootee, Aliikoo Daangooteen, warshaa xaa’oo guddaa Ityoophiyaa oomishtummaan addunyaarraa adda duree ishee taasisu ijaaruuf waliigalteen mallattaa’uu isaa kaasaniiru.
Haaluma kanaan waarshichi waggaatti xaa’oo meetiriik toonii miliyoona sadii yeroo kennameef keessatti qulqullina barbaadamuun oomishuuf dandeettii akka qabu dubbataniiru.
Warshaan xaa’oo kun damee qonnaa haalaan deeggaruun imala Itoophiyaan gara badhaadhinaatti taasiftu milkeessuu keessatti gahee olaanaa akka qabu Aliikoo Daangooteen himaniiru.
Itoophiyaan xaa’oo duraan alaa bituun rakkattu bira dabartee akka gara biyyoota birootti ergitu akka taatus akeekaniiru.
Biyya teessoo Gamtaa Afrikaa fi ardiin ittin boontuu Itoophiyaa keessatti kanaan duras invastimantii oomisha simintoo irrattis hirmaachuu eeraniiru.
Amma ammoo adeemsa oomisha xaa’oo keessatti Ityoophiyaan galtee gahaa waan qabduuf milkaa’ina damee kanaatiif ciminaan akka hojjetan ibsaniiru.
Galteen oomishaa guddaan jiraachuu, damee kana keessatti oomishtuu olaanaa kan taate Naayijeeriyaa waliin akka wal fakkaatu taasisas jedhaniiru..
Ministirri Muummee Abiyyi Ahimad (Dr.) hoogganaa mul’ata qaban akka ta’es Alii Daangooteen dubbataniiru.
Pirojektiin guddaan kun invastimantii doolaara biiliyoona 2.5 akka of keessaa qabus himuu isaanii TOI gabaaseera.
