Inisheetivii Koodaroota Miiliyoona Shanii irratti namootni Kuma 575 caalan leenjicha xumuranii waraqaa ragaa akka argatan Abbaan Taayitaa Saayinsiifi Teekinooloojii Oromiyaa beeksise.
AbbaaTaayitichaatti Daayirektara Daayirektoreetii Dhimmoota Komunikeeshinii Obbo Geetaachoo Dhugumaa, Innisheetivii Ministirri Muummee Abiyyi Ahimad (Dr.) bara 2016 eegalchiisan irratti naannoo Oromiyaa irraa namootni Kuma 575 fi 800 ol leenjicha xumuruudhaan waraqaa ragaa fudhachuu isaanii AMN Digital’itti himanii jiru.
Daayiretarichi namoota akka Itoophiyaatti leenjii barnoota bilisaa onlaayinii kennamu kanarratti namoota Miiliyoona Shan hirmaachisuuf karoorfame kana keessaa gaheen Oromiyaa Miilyoona 1.4 akka tahu eeruun, isaan keessaa kanneen Kuma 900 caalan hirmaachuu isaanii addeessaniiru.
Kanneen Waraqaa ragaa dhibbantaa 41.13 ta’uu kan himan obbo Geetaachoon, bara 2018’ttis leenjiin koodaroota Itoophiyaa kun akka naannoo Oromiyaatti namoota Kuma 412’f kennamuuf karoorfame keessaa namootni kuma 331 ol ammoo galmaa’anii leenjii kanarratti hirmaachaa jiraachuu isaanii ibsaniiru.
Obbo Geetaachoon akkaataa karoorfameen hojjattoota Mootummaa Godinaalee, magaalota, Seektara naannolee fi gama Biiroo Barnootaatiin ammoo manneen barnootaafi bakkeewwan leenjiitti akkasumas kolleejjiiwwaniifi yunivarsiitiiwwan keessatti akka kennamaa jiru itti dabaluun ibsaniiru.
Leenjiin waggaa Sadiif turu kennamuun isaa biyyattiin adeemsa hoj-maata diijitaalessuu’f tattaaffii taasisaa jirtu galmaan ga’uu keessatti gahee ol aanaa akka qabu dubbataniiru.
Dabalataanis, hojjattoota mootummaaf hojii isaanii ariifachiisuufi qulqullina dabaluu irra darbee haala sa’aatii hojii mootummaa hin tuqneen hojiiwwan onlaayinii irratti hirmaachuun akka madda galii dabalataatti isaan fayyadaa akka jirullee quba akka qaban dubbataniiru.
Malkaamuu Abbabaatiin,
