Eebbifamuu Hidha Haaromsaa Guddicha Itoophiyaa hordofuun ummanni Magaalaa Asallaa hiriiraan gammachuu isaanii ibsataa jiran irratti kan argaman Pirezidaantii Itti Aanaan Mootummaa Naannoo Oromiyaa Obbo Awwaluu Abdii Itoophiyaan akka Injifatte ibsan.
Dhalootni ammaafi mootummaan jijjiiramaa hawwii baroota dheeraa tarsiimoon masakamuun Hidha Haaromsaa Guddicha Itoophiyaa milkeessuun injifannoo Adawaa 2ffaa irra deebiin Addunyaaf akka dhugoomse obbo Awwaluun ibsaniiru.
Pirojektii karooraan milkaa’e copha, dafqaafi dhiigaan kan ijaarame ashaaraa dhaloota haaraa uummatni tokkummaan itti hirmaate injifannoo qaalii akka ta’es himaniiru.
Ijaarsi pirojektichaa shiraan xaxamee lafarra harkifamaa turus hooggansi jijjiiramaa Looreetiin Nagaa Addunyaa Ministirri Muummee Abiyyi Ahimad (Dr.) cichoominaan pirojekticha xumuruun eebbisiisuun injifannoo addunyaatti akka mul’isan Obbo Awwaluun himaniiru.
”Hidhi Haaromsaa madda anniisaa qofa osoo hin taane eenyummaa biyyaalessummaa, mallattoo bilisummaafi birmadummaa keenyaa gamtaan mirkaneeffachuu mul’isa” jedhaniiru.
Itoophiyaan rivaanii kuttee gammachuu daangaa qaxxaamure labsuu isheetiinis kanneen pirojektii kanatti danqaa ta’aa turaniis akka qaaneessite ibsuun “baga gurmoofnee, baga waloon duullee duulchifne; baga milkooftanii baga waloonis milkoofne” jechuun Obbo Awwaluun uummata naannichaa galateeffataniiru.
”Injifannoo Olka’iinsa mirkaneesse Hidha Haaromsaa Guddicha Itoophiyaa erga labsinee ajandaa guddaan ammas walooma keenya gaafatu Ulaa Galaanaa shiraan dhabne seeraan deebisuudhas” jedhaniiru.
