አዲስ ሚዲያ ኔትዎርክ

የአዲስ አበባ ከተማ ከንቲባ ወይዘሮ አዳነች አቤቤ

በአመራር ጥናት (Leadership Studies) መስክ ውስጥ ከታላላቅ ምሁራን አንዱ ተደርገው የሚወሰዱት ፕሮፌሰር ዋረን ቤኒስ “አመራር ማለት ራዕይን ወደ ተጨባጭ ውጤት የመቀየር ጥበብ ነው” ይላሉ፡፡ ወረቀት ላይ ያለው ውበት ሳይሆን የመሬት ላይ ውጤት ወሳኝ ሰለመሆኑ የሚገልጹት ምሁሩ፣ የመንግስት ፖሊሲዎች ከወረቀት አልፈው መሬት ላይ እንዲወርዱ ደግሞ በአመራር ሰንሰለት ውስጥ የሚፈጠረው ተግባቦት ወሳኝ ስለመሆኑ ጠቅሰው፣ ለዚህም ተከታታይ እና ወቅታዊ ውይይትና ስልጠናዎች ወሳኝ ስለመሆናቸው ያስረዳሉ፡፡

‘በኢትዮጵያ የመንግስት ተቋማት አመራሮች ስልጠና ተግዳሮቶች እና ዕድሎች’ ላይ የተሰራ “Challenges and Opportunities of Leadership Training in Ethiopian Public Sector” የተሰኘ ጥናት እንደሚያመላክተው፣ የመንግስት ፖሊሲዎች የአፈጻጸም ችግር እንዳይገጥማቸው አስፈፃሚዎች በቂ ስልጠና ማግኘት ይኖርባቸዋል። ስልጠናዎቹ አመራሮች ፖሊሲው ለምን እንደወጣ እና እንዴት መተግበር እንዳለበት በግልጽ እንዲረዱ ያደርጋቸዋል። በተለያዩ የአመራር እርከኖች ወጥ የሆነ የፖሊሲ አረዳድ እንዲኖር ስልጠናዎች ወሳኝ ሚና ይጫወታሉ።

የፖሊሲ ስልጠና የወሰዱ አመራሮች በህዝብ እና በመንግስት ፊት ስላላቸው ኃላፊነት የተሻለ ግንዛቤ እንዳላቸው ጥናቶች ያመላክታሉ። ስለ ፖሊሲው ብቻ ሳይሆን፣ ፖሊሲውን ወደ መሬት ለማውረድ የሚያስፈልጉ የእስትራቴጂክ እቅድ፣ የለውጥ አመራር እና የውሳኔ አሰጣጥ ክህሎቶችን ያዳብራል።

በአዲስ አበባ ዩኒቨርሲቲ የህዝብ አስተዳደር እና ልማት ማኔጅመንት መምህር ምህረት አየነው (ፕሮፌሰር) በተለይም በኢትዮጵያ ሲቪል ሰርቪስ ሪፎርም ዙሪያ ባካሄዱት ጥናት ላይ እንዳሰፈሩት የኢትዮጵያ ችግር የፖሊሲ እጥረት ወይም የፖሊሲ ጥራት ችግር አይደለም። መንግስት ዓለም አቀፍ ተቀባይነት ያላቸውን እና እጅግ ዘመናዊ የሆኑ ፖሊሲዎችን እና እስትራቴጂዎችን ይቀርጻል። አልፎ አልፎም ቢሆን ክፍተቶች የሚስተዋሉት እነዚህን ፖሊሲዎች ወደ መሬት አውርዶ የመተግበር አቅም ላይ ነው። እነዚህ ችግሮች እንዲፈቱ ደግሞ ተከታታይነት ያለው የስራ አፈጻፀም ግምገማና ስልጠናዎች ወሳኝ ሰለመሆናቸው ያስረዳሉ፡፡

ላለፉት ተከታታይ ቀናት “በመደመር መንግሥት ዕይታ፣ የዘርፎች እመርታ” በሚል መሪ ቃል በአዲስ አበባ ሲሰጥ የቆየው የአመራች ስልጠና የመንግስትን ፖሊሲ ተረድቶ ተጨባጭ ውጠቶች ለማስገኘት መሠረት ይሆናሉ፡፡ በምህረት አየነው (ፕሮፌሰር) ጥናት መሰረት ለከፍተኛና መካከለኛ አመራሮች የተሰጠው አመራሩ በሁሉም መስኮች ግንዛቤው ሰፍቶ ውጤታማ እንዲሆን የሚያስችል ይሆናል።

የአዲስ አበባ ከተማ ከንቲባ ወይዘሮ አዳነች አቤቤ ለከፍተኛ እና መካከለኛ አመራሮች ሲሰጥ በቆየው ሁለተኛ ዙር የስልጠና መድረክ ላይ ተገኝተው የማጠቃላያ መልዕክት አስተላልፈዋል። ከንቲባ አዳነች አቤቤ ባስተላለፉት መልዕክት፣ “በማያቋርጥ መፍጠር እና መፍጠን መርህ እየሰራን የኢትዮጵያን ብልፅግና እናረጋግጣለን ብለዋል፡፡ ግቦቻችንንም ለማሳካት ችግር ከመደርደር ወጥተን ችግር ፈቺዎች እንሁን” ሲሉም ተደምጠዋል፡፡

አያይዘውም አመራሩ በሁሉም መስኮች በስልጠናው ያገኘውን ግንዛቤ በተጨባጭ በሁሉም መስኮች የተመዘገቡ ስኬቶችን በማስቀጠልና ተግዳሮቶችን ወደ ድል በመቀየር፣ የተሻለችና የብልፅግና ተምሳሌት የሆነች ኢትዮጵያን ለመገንባት ትኩረት ሊያደርግባቸው እንደሚገባ ገልጸዋል።

ከንቲባዋ በመልዕክታቸው፣ አሁን የተጀመረውን ሁለንተናዊ ልማትን ለማረጋገጥ አመራሩ በተለይም በሁለት መርሆች መስራት እንዳለበት አጽንኦት ሰጥተዋል። አዳዲስ ነገሮችን ያለማቋረጥ በመፍጠርና ባልተለመዱ ዘዴዎች በመስራት እና የተለመደውን ቢሮክራሲ ትቶ፣ በልማት ስራዎች ላይ ከፍተኛ ፍጥነት በማሳየት አመራሩ ሊሰራ እንደሚገባ አስረድተዋል።

የሕዝቡን ሁለንተናዊ የመልማት ጥያቄዎች በአጭር ጊዜ ውስጥ ለመመለስ፣ እየተከናወኑ ያሉትን ዘርፈ ብዙ የልማት ስራዎች ይበልጡን ማስፋትና ማላቅ እንደሚያስፈልግ አንስተዋል ከንቲባዋ። ይህም የሚሳካው ሥራዎችን በፈጠራና ፍጥነት መርህ በማብዛትና በማስፈጸም መሆኑን ጠቁመዋል።

ውጤት ምንጊዜም ቢሆን የማያቋርጥ ልፋትን ይጠይቃል ያሉት ከንቲባ አዳነች፣ አመራሩ በሁሉም መስኮች የተመዘገቡ ስኬቶችን በማስቀጠልና ተግዳሮቶችን ወደ እድል እና ስኬት በመቀየር ሀገር ለማሻገር የሚሰራ መሆን ይጠበቅበታል ብለዋል፡፡

በእስካሁን ሂደታችንም ከህዝብ ጋር ተደምረን አያሌ ዳገቶችን ወጥተናል ያሉት ከንቲባዋ፣ ለዚህ ጉዞም የከፈልነው ዋጋ ለቀጣይ ጎዞአችን መደላድልን የፈጠርንበት ነው፤ ስለዚህም ነገን የምንጠብቃት በስጋት ሳይሆን በጉጉትና በስኬት ይሆናል ሲሉም አብራርተዋል፡፡

ከንቲባ ወይዘሮ አዳነች፣ አክለውም “በመፍጠርና በመፍጠን መስራት” የሚለው ጠንካራ መልዕክት፣ ኢትዮጵያ በዓለም መድረክ ላይ ያላትን ተወዳዳሪነት ለማሳደግ የምትከተለው እስትራቴጂካዊ የለውጥ አቅጣጫ ሆኖ ቀርቧል። አመራሩ የቆዩ ችግሮችን በፈጠራ መንገዶች በመፍታት፣ በቴክኖሎጂ የተደገፉ አዳዲስ መፍትሔዎችን መፈለግና ተግባራዊ ማድረግ አለበት። ይህ በተለይ በከተሞች ልማት፣ በመሰረተ ልማት እና በአገልግሎት አሰጣጥ ላይ ለውጥ ለማምጣት ወሳኝ ስለመሆኑም አብራርተዋል።

የዓለም የዕድገት ፍጥነት እጅግ ከፍተኛ በሆነበት ዘመን፣ ውሳኔዎችን በአፋጣኝ መስጠት፣ ቢሮክራሲን ማስወገድ እና የተጀመሩ ፕሮጀክቶችን በተቻለ ፍጥነት ማጠናቀቅ ግዴታ ነው። ፍጥነት የሌለው ዕድገት ወደ ኋላ መቅረት ነው። ይህን ወሳኝ የአስተሳሰብና የአሠራር ለውጥ አመራሩ ተረድቶ በቁርጠኝነት ሲሰራ ብቻ ነው የሚሳካው።

ሰሞኑን በመንግስት ሲሰጥ የቆየው የአመራሮች ስልጠና ከዚህ ስልታዊ ፍላጎት አንፃር ሲታይ ስልጠናው አመራሮቹ የሀገሪቱን ወቅታዊ ሁኔታ፣ ዓለም አቀፍ ተሞክሮዎችን እና የፈጠራን አስፈላጊነት በጥልቀት እንዲገነዘቡ የሚያደርግ ሆኖ እናገኘዋለን።

ከዚህ አስቀድሞም ከ2 ሺህ በላይ ከፌዴራልና ከክልል የተወጣጡ ከፍተኛ አመራሮች “በመደመር መንግሥት እይታ፣ የዘርፎች እምርታ” በሚል መሪ ሃሳብ ለ10 ተከታታይ ቀናት ስልጠና መሰጠቱም የሚታወስ ነው፡፡

በሳህሉ ብርሃኑ