አዲስ ሚዲያ ኔትዎርክ

በመዲናችን አዲስ አበባ ባሳለፍነው ሳምንት የተለያዩ ኪነ ጥበባዊ ዝግጅቶች እና አዳዲስ ጥበባዊ ስራዎች ለጥበብ አፍቃሪያን ሲደርሱ ቆይተዋል፡፡ ዛሬን ጨምሮ በሚቀጥሉት ቀናትም የተለያዩ ጥበባዊ መሰናዶዎች ይቀርባሉ፡፡ ከእነዚህ መካከል የመጻሕፍት  ምረቃ፣ የሥዕል አውደ ርዕይ እና የቴአትር መርሃ ግብር ይገኙበታል፡፡ ለመረጃ ይሆንዎት ዘንድ የአዲስ ልሳን ጋዜጣ ዝግጅት ክፍል እንደሚከተለው አዘጋጅቷቸዋል፡፡ 

መጻሕፍት

“በልብሽ ቅበሪኝ” የተሰኘው መጽሐፍ በዛሬው ዕለት ተመርቆ ለንባብ ይበቃል። መጽሐፉ የተጻፈው በደራሲ፣ ተዋናይና መድረክ መሪ በሃይሉ ሙሉጌታ ነው። የደራሲውን የግጥም ስብስቦች የያዘው ይኸው መጽሐፍ ከጠዋቱ 3፡00 ሰዓት ጀምሮ በሀገር ፍቅር ቴአትር ቤት ይመረቃል፡፡ በብዙዎች ዘንድ ባለወረቀቱ በመባል የሚታወቀው ገጣሚ፣ ተዋናይ እና የመድረክ መሪ በኃይሉ ሙሉጌታ  በሕይወት እያለ የፃፋቸው የግጥም መድብልና  ጓደኞቹ በፀሐፊው ዙሪያ የፃፏቸው ትዝታዎች እና ልዮ ገጠመኞችን የያዘ ነውም ተብሏል፡፡

መቶ ፐርሰንት (100 %) የተሰኘ መጽሐፍ ለንባብ ሊበቃ ነው፡፡ የመጽሐፉ ደራሱ ፀጋዓብ ተሰማ (ኢንጂኒዬር) ሲሆን መጽሐፉ የሳይኮሎጂ ይዘት ያለዉ ነው ተብሏል፡፡ በተለይ ለወጣቶች፣ ስኬታማ ለመሆን ጥረት እያደረጉ ለሚገኙ ሰዎች አዲስ ዕይታ እና መንገድ የሚያሳይ እንደሆነና መጽሐፉ በቅርብ ቀናት ለንባብ እንደሚበቃ ተነግሯል፡፡

ሥዕል

“ከሞትና ናይክ ከማድረግ የሚቀር የለም” የስዕል ዓውደ ርዕይ በትናንትናው ዕለት ለእይታ በቃ፡፡ በሠዓሊ ዳዊት ገረሱ የተዘጋጀው ይህ የሥዕል ዓውደ ርዕይ በኢዮቤ ልዩ ቤተ መንግስት ውስጥ በሚገኘው በአዲስ ሀውስ ኦፍ ካልቸር አርት ጋለሪ ውስጥ ተከፍቷል፡፡

በዚህ የሥዕል ዓውደ ርዕይ ላይ 200 ስራዎች ቀርበዋል። የእነዚህ የጥበብ ስራዎች ዋናው ሐሳብ በርዕዮት ዓለም /ideology/ እና በሸማችነት /consumerism/ መካከል ያለውን መመርመር ነው፡፡ ከውጭ ወደ ሐገራችን የምናስገባቸው ሀሳቦች፣ ቁሶች እና ምልክቶች እንዴት አድርጎ የራሳችንን ማንነት እንደሚለውጠው የሚያሳዩ ናቸው ተብሏል።

ይህንን ሐሳብ ለማስተላለፍ የተጠቀመበት ስልት ደግሞ ድብልቅ  የስነ ጥበብ ዘዬዎች ሲሆን ስዕል፣ ፎቶና ሌሎችንም በመጠቀም  የብዙ ዘመን ባህል፣ ታሪክ፣ ቅርስ ያላት ሀገር ህዝቦች  በርዕዮት ዓለም /ideology/ እና ሸማችነት /consumerism/  አማካኝነት የደረሰብንን ችግር ለመረዳት ያስችላሉ ተብሏል፡፡ 

ሠዓሊ ዳዊት ገረሱ የመጀመሪያ ዲግሪውን ከአዲስ አበባ ዩኒቨርሲቲ አለ የስነ ጥበባትና ዲዛይን ትምህርት ቤት በ1993 ዓ.ም አግኝቶአል። በርካታ የሥዕል ኢግዚቪሽኖችን በግልና በቡድን በተለያዩ ጋለሪዎች አሳይቷል። በተለያዩ የሥነ ጥበብ ወርክሾፖች ላይም ተሳትፏል። ዓውደ ርዕዩ እሰከ አንድ ወር  ድረስ የሚቆይ ነው፡፡

ሙዚቃ

አዲስ የጃዝ ሙዚቃ አልበም ትናንት ተመረቀ፡፡  አልበሙ የተሰራው በመሐመድ ራጁ ሲሆን ብርሃን የሚል ስያሜ ተሰጥቶታል፡፡ ይህ በመሳሪያ ብቻ የተቀነባበረ (ኢንስትሩመንታል) ነው፡፡ 

መሐመድ ራጁ ከዚህ ቀደም ሰላምታ የተሰኘና የመጀመሪያ አልበሙን በ2010 ዓ.ም ለአድማጭ ማድረሱ ይታወሳል።  “ብርሃን” የተሰኘው ሁለተኛ አልበሙ በኪቦርድ፣ ቤዝ፣ አኮስቲክ ጊታር፣ ክራር፣ የሙዚቃ መሳሪያዎች የተሰሩ የሙዚቃ ስራዎች የያዘው አዲሱ የጃዝ አልበም በናሆም ሪከርድስ አማካኝነት ለአድማጭ ደርሷል፡፡

የቴአትር መርሃ ግብር

በመዲናችን አዲስ አበባ ቅዳሜ እና እሁድ የተለያዩ ቴአትሮች ይታያሉ። የኢትዮጵያ ብሔራዊ ቴአትር 70ኛ ዓመቱን በማስመልከት ቴአትሮችን በነጻ ለተመልካች ሲያደርስ ሰንብቷል፡፡ በዛሬው ዕለትም “ላቭ ኤንድ ፒስ ቴአትር” በ8፡30 ሰዓት በነጻ ይታያል፡፡ ከቀኑ 11፡30 ሰዓት የቫራይቲ ኦርኬስትራ የሙዚቃ ድግስና የፕሮግራሙ መዝጊያ ይካሄዳል ተብሏል፡፡ እሁድ በመደበኛ (በክፍያ) በ8፡30 ሰዓት ንጉሥ አርማህ ቴአትር እንዲሁም 11፡30 ሰዓት ላይ እምዬ ብረቷ የተሰኘው ቴአትር በዚሁ በብሔራዊ ቴአትር ይታያሉ፡፡

በጊዜው አማረ