20ኛዉ የኢትዮጵያ ብሔሮች ብሔረሰቦች እና ህዝቦች ቀን “ዴሞክራሲያዊ መግባባት ለህብረብሔራዊ አንድነት ” በሚል መሪ ቃል እየተከበረ ይገኛል፡፡
ከህዳር ወር መግቢያ ጀምሮ በአዲስ አበባ ከተማ በሚገኙ የተለያዩ ክፍለ ከተሞች እና ተቋማት በድምቀት ሲከበር የቆየው 20ኛው የኢትዮጵያ ብሔሮች ብሔረሰቦች እና ህዝቦች ቀን የማጠቃለያ መርሀ ግብር በአራዳ ፓርክ በተለያዩ መርሃ ግብሮች ተካሄዷል።
በመርሃ ጎብሩ ላይ ንግግር ያደረጉት የፌዴሬሽን ምክር ቤት አፈ ጉባኤ አቶ አገኘሁ ተሻገር አዲስ አበባ ከተማ ከሁሉም ማዕዘናት የተውጣጡ ብሄሮች ብሔረሰቦች የሚኖሩባት ሕብረ ብሔራዊነት ያደመቃት ከተማ ናት ብለዋል፡፡
ሀገር አቀፍ እና አለም አቀፍ ሁነቶችን በማስተናገድ ዜጎች በቀላሉ እንዲገናኙ ፣ ባህል እና ወግ እንዲለዋወጡ ያስቻለች ውብ የአፍሪካ ከተማ መሆኗም ጠቅሰዋል፡፡
ይህ ተግባር መዲናዋ ከአለም አቀፍ እና ከክልል ከተሞች ጋር ያላትን መስተጋብር ከፍ እንዲል አድርጎታል ብለዋል፡፡
በመዲናዋ እየተተገበሩ ያሉና ህብረ ብሄራዊ አንድነትን የሚያጠናክሩ ሰው ተኮር ተስፋ ሰጪ፣ ፍትሀዊ እና የህዝብን ተጠቃሚነት የሚያረጋግጡ የልማት ስራዎች ተጠናክረው እንደሚቀጥሉ ተናግረዋል፡፡
የዘንድሮ የኢትዮጵያ ብሔሮች ብሄረሰቦች እና ህዝቦች ቀን ኢትዮጵያ እየመከረች ባለችበት ወቅት የሚከበር መሆኑ ልዩ ገጽታ አጎናጽፎታል ያሉት አፈ ጉባኤ አገኘሁ ውይይት እና ምክክር ወደ እውነት የሚያደርሱ መንገዶች ከመሆናቸው ባሻገር ሀገርን ወደ አንድነት እና ብልጽግና የሚያሻግሩ ተግባራት ናቸው ብለዋል።
ብዝሃነት ለሀገራዊ እድገት እና ለህብረ ብሔራዊነት መገለጫ መሆናቸውን ገልጸዋል።
በፍሬህይወት ብርሃኑ
