የተጀመሩ የልማት ስራዎች የህዝቡን ጥቅም እንዲያረጋግጡ የማድረግ ተግባር ተጠናክሮ እንደሚቀጥል የአዲስ አበባ ከተማ ከንቲባ አዳነች አቤቤ ገለጹ፡፡
የአዲስ አበባ ከተማ ከንቲባ አዳነች አቤቤ በአዲስ ካፒታል እቃ ፋይናንስ ንግድ ስራ አ.ማ የተገነባውን እና በ1320 ካሬ ላይ ያረፈውን ዘመናዊ ህንጻ መርቀው ሥራ አስጀምረዋል፡፡
በዚሁ ወቅት መልዕክት ያስተላለፉት ከንቲባ አዳነች የአዲስ ካፒታል እቃ ፋይናንስ ንግድ ስራ አ.ማ ከተቋቋመ 11 ዓመታት ያስቆጠረ ቢሆንም ተጨባጭ ለውጦችን ማምጣት የቻለው ግን በለውጡ ዓመታት መሆኑን ገልጸዋል፡፡
አዲስ ካፒታል እቃ ፋይናንስ ንግድ ስራ አ.ማ የካፒታል እቃ ፋይናንሲንግ ተቋማት ውስጥ ያለው ድርሻ እያደገ መምጣቱን የጠቆሙት ከንቲባ አዳነች ተቋሙ ተኪ ምርቶች እንዲመረቱ በር ከመክፈት ጀምሮ ለበርካቶች የስራ እድል በመፍጠር ተጨባጭ ውጤት አስገኝቷል ብለዋል፡፡
ተቋሙ የጀመረውን ውጤታ ሥራ ያስቀጥል ዘንድ ከተማ አስተዳደሩ አስፈላጊውን ድጋፍ ያደርጋልም ነው ያሉት፡፡
ህንጻው ከተማዋ በምትመራበት የፍጥነት እና ጥራት አግባብን ተከትሎ ደረጃውን ጠበቆ የተገነባ መሆኑን ተናግረዋል፡፡
በመዲናዋ የተጀመሩ የልማት ስራዎች የህዝቡን ጥቅም እንዲያረጋግጡ የማድረግ ተግባር ተጠናክሮ እንደሚቀጥልም አስታውቀዋል፡፡
የአዲስ ካፒታል እቃ ፋይናንስ ንግድ ስራ አ.ማ 3.3 ቢሊየን ብር ሀብት ማካበት መቻሉን በመድረኩ ተገልጿል፡፡
በሀብታሙ ሙለታ
