አምባሳደሮችና የዲፕሎማቲክ ተቋማት ተወካዮች በድሬዳዋ እያደረጉት ያለው ጉብኝት የቱሪዝም ዘርፉን እድገት ለማጉላት መደላድል እንደሚፈጥር የቱሪዝም ሚኒስትር ሰላማዊት ካሳ ተናገሩ።
በቱሪዝም ሚኒስትር ሰላማዊት ካሳና በዩኔስኮ የኢትዮጵያ ዳይሬክተር ሪታ ቢስኖውዝ (ዶ/ር) የተመራ እና ተቀማጭነታቸው አዲስ አበባ የሆኑ የተለያዩ አገራት አምባሳደሮችና የዲፕሎማቲክ ተቋማት ተወካዮች የሐረር ከተማ ጉብኝታቸውን አጠናቀው ዛሬ ድሬዳዋ ገብተዋል።
ድሬዳዋ ሲደርሱም በአስተዳደሩ የኪነ ጥበብ ቡድን የብሔረሰቦችን ባህላዊና ትውፊታዊ ሙዚቃ አቀባበል ተደርጎላቸዋል።
በስነስርዓቱ ላይ የቱሪዝም ሚኒስትሯ ሰላማዊት ካሳ እንዳሉት ድሬዳዋ የሀገር ውስጥና የውጭ ቱሪስቶችን መሳበ የሚችሉ የቱሪዝም ሀብቶች ባለቤት መሆኗን ተናግረዋል ።
እነዚህን ሰውሰራሽናና ተፈጥሯዊ የቱሪዝም ሀብቶቸ ማልማትና በማስተዋወቅ የዘርፉን ሁንተናዊ ጠቀሜታ ማሳደግ ይገባል ብለዋል።
ዛሬ በድሬዳዋ የተገኙት አምባሳደሮችና የዲፕሎማቲክ ተቋማት ተወካዮች የቱሪዝም ሀብቶች መጎብኘታቸው የዘርፉን እድገትና ፋይዳ ለማጉላት መደላድል እንደሚፈጥርም ሚኒስትሯ ጠቁመዋል።
የድሬዳዋ አስተዳደር ከንቲባ ከድር ጁሃር በበኩላቸው ድሬዳዋ ብሔሮች፣ ብሔረሰቦች እና ህዝቦች በፍቅር፣ በሰላም እና በአንድነት ተዋደው የሚኖሩባት መሆኗን አንስተዋል።
ድሬዳዋ ያሉ ቅርሶችና የቱሪስት መዳረሻዎችን በማልማት ኢኮኖሚያዊና ማህበራዊ ፋይዳቸውን ለማሳደግ ትኩረት ተሰጥቶ መሰራቱን ተናግረዋል።
አምባሳደሮች እና የዲፕሎማቲክ ማህበረሰብ አካላት ወደአካባቢው መምጣት ተፈጥሯዊና ሰው ሰራሽ ሃብቶችን ከመጎብኘት ባለፈ የመረጃዎቹን ተደራሽነት በማስፋት የዘርፉን ጥቅም ለማሳደግ እድል ይሰጣል ብለዋል።
በምስራቁ የኢትዮጵያ ክፍል ውብና ድንቅ ታሪካዊና ባህላዊ ማንነቶች መመልከታቸውን የተናገሩት ደግሞ በኢትዮጵያ የዩኔስኮ ዳይሬክተር ሪታ ቢስኖውዝ (ዶ/ር) ናቸው።
በድሬዳዋ የተደረገላቸው ደማቅ አቀባበልም ይህንኑ የሚያረጋግጥ መሆኑን መግለጻቸዉን ኢዜአ ዘግቧል፡፡
በቱሪዝም ሚኒስትሯ ሰላማዊት ካሳ እና በዩኔስኮ የኢትዮጵያ ዳይሬክተር የተመራው የዲፕሎማቲክ ማህበረሰብ ቡድን በአሁን ወቅት በድሬዳዋ እየተካሄዱ የሚገኙ የልማት ፕሮጀክቶችንና የቱሪዝም ሃብቶችን እየተመለከተ ነው።
