የኢፌዴሪ አየር ኃይል 90ኛ ዓመት የምስረታ በዓልን በማስመልከት በቢሾፍቱ ከተማ የተካሄደውን የ10 ኪሎ ሜትር የሩጫ ውድድር በወንዶች ጌታነህ ሞላ በሴቶች ደግሞ ቢቂሌ አምበሳ በማሸነፍ እያንዳንዳቸው የ500ሺህ ብር ሽልማት ተበርክቶላቸዋል።
”ለኢትዮጵያ አየር ኃይል በሙሉ አቅሜ እሮጣለሁ” በሚል የኢፌዴሪ አየር ኃይል 90ኛ ዓመት የምስረታ በዓል ምክንያት በማድረግ በተካሄደው የ10 ኪሎ ሜትር የጎዳና ላይ ሩጫ ጨምዴሳ ደበለ እና ቢኒያም መላኩ 2ኛ እና 3ኛ በመውጣት የሜዳሊያና ገንዘብ ሽልማት ወስደዋል።
በሴቶችም በተመሳሳይ ሀዊ ፈይሳ እና ግርማሚት ገብረ እግዚአብሔር 2ኛ እና 3ኛ ወጥተው ሽልማት አግኝተዋል።
በሁለቱም ፆታ 4ኛ እና 5ኛ የወጡ ተወዳዳሪዎችም የገንዘብ ሽልማት አግኝተዋል።
በውድድሩ 25 ሺህ የሚሆኑ ተሳታፊዎች ተወዳድረዋል።
ሽልማቱን የሰጡት የኢፌዴሪ አየር ኃይል ዋና አዛዥ ሌተናል ጄኔራል ይልማ መርዳሳ፣ 90ኛ ዓመቱን እያከበረ ያለው አየር ኃይል የኢትዮጵያ ታላቅነት ማሳያ ነው ብለዋል።
90ኛውን ዓመት ምክንያት በማድረግ በቀጣይ በዓለም አቀፍ ደረጃ ተወዳዳሪ የሆነ የአየር ትርዒት፣ የአፍሪካ አየር ኃይል ኮንፍረንስ እና ሌሎች ፕሮግራሞች እንደሚካሄዱም ዋና አዛዡ ገልፀዋል ።
የበዓሉ መከበር ለቢሾፍቱ ከተማ አዎንታዊ ትሩፋቶችን ማስገኘቱን የገለፁት ሌተናል ጄኔራል ይልማ መርዳሳ፣ በዓሉ በቀጣይነት እንደሚከበርም ተናግረዋል።
በአሰግድ ኪዳነማርያም
