አዲስ ሚዲያ ኔትዎርክ

AMN – ግንቦት 17/ 2018 ዓ.ም

በአዲስ አበባ ከተማ ባለፉት 5 ዓመታት ብቻ በትላልቅ ሜጋ ፕሮጀክቶች፣ በኮሪደር ልማቶች፣ በኢኮኖሚና በሰው ተኮር ዘርፎች የተከናወኑ ከ60 ሺህ በላይ ፕሮጀክቶች ተጠናቀው ለአገልግሎት ክፍት መደረጋቸውን የአዲስ አበባ ከተማ ከንቲባ አዳነች አቤቤ በ2018 በጀት አመት የ9 ወራት የከተማ አስተዳደሩን አፈፃፀም ሪፖርት ባቀረቡት ወቅት ገልጸዋል።

ይህ እጅግ ከፍተኛ ቁጥር ያለው የፕሮጀክቶች አፈፃፀም ከተማዋ የጀመረችውን ወደ “ስማርት ከተማነት” እና ወደ አረንጓዴ ኢኮኖሚ የምታደርገውን ታሪካዊ ሽግግር በተጨባጭ ያረጋገጠ መሆኑም ተመላክቷል፡፡

ባለፉት 5 ዓመታት ውስጥ የከተማዋን መልክ ሙሉ በሙሉ በቀየረው የኮሪደር ልማት ፕሮጀክት በመጀመሪያው ምዕራፍ ብቻ ከ80 ኪሎ ሜትር በላይ ርዝመት ያላቸው ዋና ዋና መንገዶች እንደ ፒያሳ-አራት ኪሎ፣ መገናኛ-ቦሌ፣ ሜክሲኮ-ሳርቤት ደረጃቸውን የጠበቁ የህንጻ እድሳቶችንና ውበቶችን አካተው ተገንብተዋል።

በተጨማሪም በከተማዋ ታሪክ ለመጀመሪያ ጊዜ ከ200 ኪሎ ሜትር በላይ የሚረዝሙ እና ቀጣይነት ያላቸው ዘመናዊ የእግረኛና የብስክሌት መንገዶች ተገንብተው ለአገልግሎት በቅተዋል።

የትራፊክ መጨናነቅን በዘላቂነት ለመቀነስም በሜክሲኮ፣ በቦሌ እና በሳርቤት አካባቢዎች 3 ግዙፍ የመንገድ ማስተላለፊያዎች እና የአየር ላይ ድልድዮች ተገንብተዋል።

ኢትዮጵያ የአየር ንብረት ለውጥን ለመቋቋም የምትከተለውን አረንጓዴ ኢኮኖሚ ስትራቴጂ መሠረት በማድረግ፣ የከተማዋ የትራንስፖርት ዘርፍ ከነዳጅ ተሽከርካሪዎች ወደ ኤሌክትሪክ ሽግግር አድርጓል።

በዚህም ከ200 በላይ ሙሉ በሙሉ በኤሌክትሪክ የሚሰሩ ዘመናዊ አውቶቡሶች ከአንበሳ እና ሸገር የሕዝብ ትራንስፖርት አገልግሎቶች ጋር ተቀናጅተው ስራ የጀመሩ ሲሆን፤ እነዚህን አውቶቡሶችና የከተማዋን ነዋሪዎች የግል የኤሌክትሪክ መኪናዎች በሃይል ለመደገፍ ከ60 በላይ ዘመናዊ የኤሌክትሪክ መኪና የቻርጅ ጣቢያዎች በተለያዩ ክፍለ ከተሞች ተገንብተው ስራ ላይ ውለዋል።

አዲስ አበባ በአህጉራዊና ዓለም አቀፋዊ የባህል ዲፕሎማሲ ያላትን ተደራሽነት ከፍ ያደረጉ ቢሊዮን ብሮችን የፈጁ የቅርስና የትውልድ መታሰቢያ ፕሮጀክቶች ተገንብተዋል።

በ5 ሄክታር መሬት ላይ ያረፈውና ዘመናዊ የአህጉር አቀፍ ስብሰባ አዳራሾችን፣ ታሪካዊ ሙዚየምን እና ከ2,500 በላይ መኪናዎችን በአንድ ጊዜ መያዝ የሚችል የመሬት ውስጥ መኪና ማቆሚያን ያካተተው የአድዋ ድል መታሰቢያ ማዕከል እንዲሁም በ6 ነጥብ 7 ሄክታር መሬት ላይ በክብ ቅርጽ የተገነባውና የምስራቅ አፍሪካ የሰው ሰራሽ አስተዋፅኦ (AI) መገኛ የሆነው የሳይንስ ሙዚየም ዋነኞቹ ናቸው።

በተጨማሪም የእንጦጦ ፓርክ፣ የአንድነት ፓርክ እንዲሁም የወዳጅነት አደባባይ (ምዕራፍ 1 እና 2) ግንባታዎች መጠናቀቅ ከተማዋን ወደ ታላላቅ የኢኮ-ቱሪዝም እና የመዝናኛ ማዕከልነት ቀይረዋታል።

የከተማዋ ትልቁ እና እጅግ ዘመናዊው የግብርና ምርቶች የንግድ ማዕከል ሆኖ የተከፈተው የለሚ ሁለገብ ዘመናዊ የገበያ ማዕከል ደላሎችን በማስቀረት የክልል አምራቾችን እና የከተማዋን ሸማቾች በቀጥታ በማገናኘት ላይ ይገኛል።

ይህንን ስራ ለማገዝም በሁሉም ክፍለ ከተሞች ከ11 በላይ ግዙፍ የቅዳሜና እሁድ የሸማቾች የገበያ አዳራሾች ተገንብተዋል።

በትምህርትና ማህበራዊ ዘርፍ የከተማ አስተዳደሩ ባደረገው ከፍተኛ ኢንቨስትመንት፣ ባለፉት አምስት ዓመታት ከ70 ሺ በላይ የጋራ መኖሪያ ቤቶች (ኮንዶሚኒየሞች) እና የቅናሽ ዋጋ የመንግስት ቤቶች ግንባታቸው ተጠናቆ በቤት ዕጣ አማካኝነት ለነዋሪዎች ተላልፈዋል።

በተጨማሪም መሰረታዊ የምግብ ቁሳቁሶችን በከፍተኛ ሁኔታ በድጎማ ለማቅረብ የተገነቡ ግዙፍ የዳቦ ፋብሪካዎች እንደ ሸገር ዳቦ ፋብሪካ ያሉ እና የምግብ ማቀነባበሪያ ፋብሪካዎች ተገንብተዋል።

በሁሉም የመንግስት አንደኛ ደረጃ ትምህርት ቤቶች ውስጥ በተገነቡት ዘመናዊ ማዕከላት አማካኝነትም በአሁኑ ጊዜ በቀን ሁለት ጊዜ ከ700 ሺህ በላይ ተማሪዎች በዘላቂነት እየተመገቡ ይገኛሉ።

እነዚህ ዘርፈ ብዙ ስኬቶች፣ ከተማዋን ውብ፣ ፅዱ፣ በቴክኖሎጂ የዳበረችና ለነዋሪዎቿ ምቹ መኖሪያ የማድረግ ሰው ተኮር ስትራቴጂካዊ ራዕይ በተግባር መከናወኑን የሚያሳዩ ታላላቅ ማረጋገጫዎች ናቸው።

በወርቅነህ አቢዮ