Sabootni, sab-lammootniifi uummattootni Itoophiyaa Aadaa, Afaaniifi Eenyummaa walii isaanii kabajuun haalli ittiin jiraatan madda qorannoofi qo’annoo akka ta’e Daayirektarri Dhimmoota Kominikeeshinii Mana Maree Federeeshinii Obbo Tarrafaa Badhaadhaa ibsan.
Aadaa, Afaanifi Eenyummaa ofiitiin boonuun duraan sodaa ture sun jijjiiramaan booda miidhaginni sab-daneessummaan uumame madda diinagdeefi bu’uura diimookiraasii ta’eera jedhaniiru.
Kana irraa kan ka’es, guyyaan Saboota, Sab-lammootaafi Uummattootaa tokkummaan kabajamaa akka jiru turtii AMN PLUS Qophii Addaa irratti taasisaniin Obbo Tarrafaa Badhaadhaa ibsaniiru.
Itoophiyaan biyya Sabootaafi Sab-lamoonni hedduun keessa jiraatan ta’uu kan dubbatan Obbo Tarrafaan, “aadaa, afaanifi eenyummaan uummatoota kanaa heera mootummaatiin ragga’ee tokkummaafi jaalalaan kabajachaa jiru” jedhaniiru.
Guyyaan kabaja ayyaana Saboota, Sab-lammootaafi Uummattoota Itoophiyaas waltajjii uummatni heddummina aadaatiin bahanii miidhagina aadaa isaanii walitti agarsiisan akka ta’es dubbataniiru.
Dabalataanis, guyyaan Kun qabeenya uumamaafi nam-tolchee akkasumas iddoowwan tuurizimiifi carraa invastimantii naannoo beeksisuu keessatti gumaacha olaanaa akka qabus kaasaniiru.
Keessattu guyyichi duudhaa biyya keenyaa wal baruufi waliif birmachuu kan dhugoomsu akka ta’e Obbo Tarrafaan himaniiru.
Imala jijjiiramaa Amma jiruun gaaffiin Sabaafi Sablammootaa mirga ofiin of bulchuufi karaa diimokiraatawaa ta’een heera mootummaatiin gaafatan akka deebi’eef kaasuun kan hafes deebi’aa jiraachuu eeraniiru.
”Sabootni, sab-lammootniifi uummattootni Itoophiyaa garaa garummaa tokko malee faayidaa biyyaalessaa kan ta’e gaaffii ulaa galaanaa kan deeggaraniifi jijjiirama qilleensaa ittisuuf hirmaannaan ashaaraa magariisaa irratti agarsiisan olaanaa akka ta’e” dubbataniiru.
Kabajni guyyaa Saboota, Sablammootaafi Uummattoota Itoophiyaas sabdaneessummaa cimaa fiduun ilaalcha biyyaalessaa akka tokkoomsee ibsaniiru.
Daraartuu Tarreessaatu qindeesse
