Magaalaan Finfinnee iddoowwan seenaa fi qabiyyee seenaa ishee akkaataan ittin kunuunsite biyyoota birootifillee fakkeenya akka ta’e hirmaattonni Yaa’ii Barnoota Afrikaa 41ffaa dubbataniiru.
Lammiileen Afriikaa fi lammiileen biyyoota biroo dhimmoota adda addaatiif magaalaa Finfinnee dhufan magaalatti daawwachuun jijjiirama mul’aterratti dinqisiiffannaa qaban dubbataniiru. Naamibiyaa irraa kan dhufte Kileemantiinaa Kaaraaliis jijjiirama Magaalaa Finfinnee keessatti argite irraa kan ka’e lammii Afrikaa ta’uu isheetiin akka boontu dubbatti.
Hojii mootummaan Magaalaa Finfinnee keessatti hojjechaa jiru akka ajaa’ibsiifatte fi mootummaan qabeenya ummata irraa walitti qabu sirnaan misooma irratti invast gochaa jiraachuu agarsiisa jedhan.
Dargaggeessi Naayijeeriyaa irraa dhufe Abubakar Abdullaahii bareedinni fi guddinni Magaalaan Finfinnee agarsiste sadarkaa ajaa’ibaa irra akka jiru ragaa ba’eera. Ingilizii irraa kan dhufe Taayilar Iziman gama isaatiin hojiilee misoomaa magaalatti keessatti hojjetaman baay’ee akka dinqisiifate dubbateera.
Afrikaa Kibbaarraa kan dhufe Moorzis Baaditeelee fi Leesseetoorraa kan dhufe Dr.Maamatiimalaa Baakoobeellaan Magaalaan Finfinnee yeroo gababaa keessatti haala kanaan akkanatti ni misoomti jennee hin eegne jedhan.
Misoomni koridarii daandiiwwani magaalattiin mijooftuufi fi bareedduu akka taatu kan taasise konfiraansiiwwan idil-addunyaa adda addaa keessummeessuuf magaalaa filatamaa akka taatus taasisa jedhaniiru.
Daawwattoonni kunneen bareedinni Magaalaa Finfinnee bu’aa tumsa waloo mootummaa fi ummataa ta’uu ibsuun, ragaan dhugaa kanaas magaalattiin waggoota muraasa keessatti jijjiiramuu isheeti jedhan. Muuxannoo gaarii kanas biyya isaanii keessatti hojiirra oolchuu akka barbaadan daawwattoonni kunneen ibsaniiru.
Shuumii Badhaasootiin
