አዲስ ሚዲያ ኔትዎርክ

AMN- ሚያዝያ 02/2018 ዓ.ም

በዓለም ዙሪያ የተለያዩ ሃገራት የኢየሱስ ክርስቶስን መከራና ስቅላት የሚያስበውን የስቅለት በዓል በዛሬው ዕለት በተለያዩ ሃይማኖታዊና ባህላዊ ሥነ-ሥርዓቶች በድምቀት አስበውት ውለዋል።

በተለይም በኢየሩሳሌም፣ በሮም፣ በፊሊፒንስና በስፔን የታዩት ልዩ ልዩ የበዓሉ አከባበር ገጽታዎች የብዙዎችን ትኩረት ስበዋል።

በቅድስት ከተማ ኢየሩሳሌም በሺዎች የሚቆጠሩ ምዕመናን ክርስቶስ መስቀሉን ተሸክሞ ያለፈበትን ታሪካዊውን “ቪያ ዶሎሮሳ” (የሕመም መንገድ) በመከተል የመስቀል ጉዞ አድርገዋል።

ከባድ የእንጨት መስቀሎችን የተሸከሙ ምዕመናን ጉዟቸውን ያጠናቀቁት ክርስቶስ ተሰቅሎበታል ተብሎ በሚታመነውና በታነጸው የቅዱስ መቃብር ቤተ-ክርስቲያን ውስጥ ነው።

በቫቲካን- ሮምም የካቶሊክ ቤተ-ክርስቲያን መሪ ርዕሰ ሊቃነ ጳጳሳት ፍራንሲስ በታሪካዊው ኮሎሲየም አደባባይ “የመስቀል መንገድ” ጸሎትን መርተዋል።

በሺዎች የሚቆጠሩ ምዕመናን በሻማ ብርሃን ታጅበው 14ቱን የመስቀል ጣቢያዎች እያሰቡ የጸሎትና የንስሐ ጊዜ አሳልፈዋል።

በሰሜናዊ ፊሊፒንስ የሚገኙ አንዳንድ ምዕመናን ደግሞ የክርስቶስን መከራ ለመካፈል ራሳቸውን በመስቀል ላይ እስከ መቸንከርና ጀርባቸውን እስከ መግረፍ የሚደርሱ ጠንከር ያሉ ሃይማኖታዊ ክንውኖችን አከናውነዋል።

በሌላ በኩል ስፔኖች “ናዛሬኖስ” በሚባሉ ንስሐ ገቢዎች የታጀበ ታላቅ የጎዳና ላይ ሰልፍና ምስለ-ክርስቶስን የተሸከሙ መድረኮችን በማንቀሳቀስ በዓሉን በታላቅ ድምቀት ዘክረዋል።

በአጠቃላይ በላቲን አሜሪካ የጎዳና ላይ ድራማዎችን ጨምሮ በመላው ዓለም የሚገኙ የኦርቶዶክስ፣ የካቶሊክ እና የፕሮቴስታንት እምነት ተከታዮች ቀኑን በመንፈሳዊ ሥነ-ሥርዓት ማሳለፋቸውን ሮይተርስ እና ቢቢሲን ጨምሮ ዓለም አቀፍ የዜና ምንጮች ዘግበዋል።

በአስማረ መኮንን