ኢትዮጵያ ሀገራዊ የዴሞክራሲ ሥርዓት ግንባታዋን ወደ ላቀ ደረጃ በማሸጋገር ላይ ትገኛለች። በስኬት የተጠናቀቀውን 7ኛውን ሀገራዊ ምርጫ ተከትሎ፣ የህዝብን ድምፅና ሙሉ እምነት በማግኘት ሀገር የመምራት ታላቅ ኃላፊነትና ዕድል ያገኘው አሸናፊው ፓርቲ፣ የመንግስት ምስረታ ሂደቱን በተያዘለት ግልጽ የጊዜ ሰሌዳና ሕጋዊ ቅደም ተከተል መሠረት በጥንቃቄና በኃላፊነት ስሜት በማከናወን ላይ ይገኛል። ይህ ስልጡን ሂደት የህግ የበላይነትንና የታላቋን ሀገር ሕገ-መንግስታዊ ሥርዓት ጥንካሬ በግልጽ የሚያሳይ ነው።
አሸናፊው ፓርቲ የህዝብን አደራ ተረክቦ ሀገር የመምራት ተልዕኮውን ሲጀምር፣ የመንግስት መዋቅሮችን የማደራጀትና የአመራር ምደባዎችን የማካሄድ ሥራዎችን አስቀድሞ በተቀመጠው ፕሮግራም መሠረት በቅደም ተከተል እያከናወነ ይገኛል። ሂደቱ የህዝብን ጥያቄዎችና የልማት ፍላጎቶች በብቃት መመለስ በሚያስችል መልኩ የተቃኘ ሲሆን፣ በተያዘለት ቀነ-ገደብ መከናወኑም የፖለቲካ ብስለትና የተቋማት ዝግጁነትን የሚያረጋግጥ አወንታዊ እርምጃ ተደርጎ ይወሰዳል።
እስካሁን ባለው ሂደትም በሁሉም የሀገሪቱ ክልሎች እንዲሁም በሁለቱ የከተማ አስተዳደሮች (አዲስ አበባ እና ድሬዳዋ) የመንግስት ምስረታ ሥራዎች በስኬት ተጠናቀዋል። የምክር ቤት አባላት ቃለ-መሀላ በመፈጸም፣ የክልልና የከተማ አስተዳደር መሪዎችንና ሥራ አስፈጻሚ አካላትን በመሰየም ሕጋዊና ዴሞክራሲያዊ የመንግስት መዋቅሮቻቸውን ሙሉ በሙሉ መስርተዋል። ይህም በየደረጃው የሚገኘው ሕዝብ ተገቢውን የመልካም አስተዳደርና የልማት አገልግሎት ያለአንዳች መስተጓጎል እንዲያገኝ ትልቅ መሠረት ጥሏል።
ክልላዊና ከተማ አቀፍ ምስረታዎቹን ተከትሎ፣ በነገው ዕለት ማለትም መስከረም 25 ቀን 2019 ዓ.ም የፌደራል መንግስቱ በተያዘለት ትክክለኛ የጊዜ ሰሌዳ መሠረት የመንግስት ምስረታውን በይፋ ያከናውናል። የሕዝብ ተወካዮች ምክር ቤት እና የፌዴሬሽን ምክር ቤት የጋራ ስብሰባቸውን በማካሄድ የፌደራል መንግስቱ ከፍተኛ መሪዎችንና የካቢኔ አባላትን የሚሰይሙ ሲሆን፣ ይህም የኢትዮጵያን የሥልጣን ትረካ በሕጋዊና በሰላማዊ መንገድ የሚያጸና ታሪካዊ ክስተት ይሆናል።
ይህ በተያዘለት የጊዜ ሰሌዳ መሠረት እየተከናወነ ያለው የመንግስት ምስረታ ኢትዮጵያ ሙሉ በሙሉ በሥራ ላይ መሆኗንና ተቋማዊ ጥንካሬዋን በትልቁ የሚያሳይ ደማቅ ማረጋገጫ ነው። ሀገሪቱ በሁሉም መስክ የጀመረቻቸውን ዘመነኛ የልማት፣ የኢኮኖሚና የማህበራዊ ማሻሻያዎች ያለማቋረጥ ለማስቀጠል ዝግጁ መሆኗን የሚያበስር ከመሆኑም በላይ፣ መንግስታዊ ሥርዓቱ በከፍተኛ ኃላፊነትና ፍጥነት እየተገነባ መሆኑን ለሀገር ውስጥና ለዓለም አቀፍ ማህበረሰብ በተግባር ያሳያል።
የ7ኛውን ሀገራዊ ምርጫ ውጤት መሠረት በማድረግ እየተካሄደ ያለው የመንግስት ምስረታ ሂደት ለኢትዮጵያ አዲስ የብልጽግናና የተስፋ ምዕራፍ የሚከፍት ነው። የፌደራል መንግስቱ ምስረታ ሲጠናቀቅ ሀገሪቱ የተያያዘችውን የልማትና የሰላም ጉዞ ይበልጥ በማፋጠን፣ የህዝቧን ሁለንተናዊ ተፎካካሪነትና ደህንነት ለማረጋገጥ በሙሉ አቅሟ ወደ ሥራ ትገባለች። ኢትዮጵያ በፅናት፣ በእውቀትና በአንድነት ወደፊት መጓዟን ትቀጥላለች።
በሹመት ደመቀ
