አዲስ ሚዲያ ኔትዎርክ

AMN ሐምሌ 10/2018 ዓ.ም

የዓለም ዋንጫ በዓለም ላይ ከሚካሄዱ የስፖርት ውድድሮች ሁሉ ከፍተኛው ክብር ያለው መድረክ ነው። ከ1930 ጀምሮ በየአራት ዓመቱ ሲካሄድ የቆየው ይህ ውድድር አሸናፊ ቡድኖችን በዋንጫና በወርቅ ሜዳሊያ ብቻ ሲሸልም ቆይቷል።

ይሁን እንጂ በ2026 የዓለም ዋንጫ አዲስ ምዕራፍ ተከፍቷል። ፊፋ ለመጀመሪያ ጊዜ የአሸናፊው ቡድን ተጫዋቾችና አባላት ልዩ የወርቅ ቀለበት እንዲሸለሙ መወሰኑ የስፖርት ዓለምን ትኩረት ስቧል።

ይህ ውሳኔ በዘፈቀደ የተወሰነ አይደለም ፤ ከኋላው በርካታ ምክንያቶች አሉት። ከሁሉ በፊት ፊፋ የዓለም ዋንጫን ከ90 ደቂቃ ውድድር በላይ ዘላቂ ታሪክ እንዲሆን ለማድረግ እየሰራ ነው። ተጫዋቾች የዓለም ዋንጫን ካነሱ በኋላ ዋናው ዋንጫ የፊፋ ንብረት ስለሆነ ለዘላለም አይይዙትም።

ሜዳሊያውም በክብር ቢቀመጥም በየቀኑ የሚለበስ ወይም የሚታይ ነገር አይደለም። አዲሱ የወርቅ ቀለበት ግን ተጫዋቾች በማንኛውም ጊዜ ሊያደርጉት የሚችሉትና የዓለም ሻምፒዮንነታቸውን የሚያስታውስ የግል ቅርስ እንዲሆን ታስቦ ነው።

ሌላው ጉዳይ የ2026 የዓለም ዋንጫ አዘጋጅነት ነው። ውድድሩ በአሜሪካ ፣ ካናዳና ሜክሲኮ በጋራ ይካሄዳል። በተለይም በአሜሪካ NBA ፣ NFL ፣ MLB እና NHL ውድድሮች አሸናፊዎችን የወርቅ ቀለበት መሸለም ለብዙ ዓመታት የተለመደ ባህል ነው።

እነዚህ ቀለበቶች ከሜዳሊያ በላይ የክብር ምልክት ተደርገው ይቆጠራሉ። ፊፋም ይህን ባህል ከዓለም እግር ኳስ ጋር በማጣመር የዓለም ዋንጫን ለአዲስ ትውልድ ይበልጥ ለማቅረብ እንደፈለገ ይታያል።

ከዚህ ባሻገር ፊፋ የስፖርት ግብይትን እና የንግድ ገቢን የማስፋት ስልት እየተከተለ መሆኑም ይገመታል። በመረጃዎች መሠረት ለአሸናፊው ቡድን የሚሰጡት ቀለበቶች ብቻ ሳይሆኑ፣ በተወሰነ ቁጥር ለደጋፊዎች የሚሸጡ ልዩ ቀለበቶችም ተዘጋጅተዋል።

ይህም የዓለም ዋንጫን ከስፖርት ክስተት ባሻገር በከፍተኛ የንግድ ዋጋ ያለው ዓለም አቀፍ ብራንድ ለማድረግ የተወሰደ እርምጃ መሆኑን ያሳያል።

በእርግጥ ይህ ውሳኔ ሁሉንም አላሳመነም። አንዳንድ የእግር ኳስ ታሪክ ተከታታዮች የዓለም ዋንጫ የራሱ ባህልና መለያ እንዳለው በማስታወስ ፣ የአሜሪካን የስፖርት ባህል ወደ ዓለም እግር ኳስ ማስገባት የውድድሩን ታሪካዊ ማንነት ሊቀይረው ይችላል ይላሉ።

ሌሎች ደግሞ ይህ የዓለም ዋንጫን የሚያዘምን ፣ ለተጫዋቾችም የበለጠ የግል ክብር የሚሰጥ አዎንታዊ እርምጃ ነው በማለት ይደግፉታል።

ፊፋ የወሰደው ይህ ውሳኔ ከቀለበት በላይ ትርጉም አለው። የዓለም ዋንጫ በታሪኩ አዲስ ምዕራፍ እየከፈተ መሆኑን፣ የስፖርት ባህል ፣ የንግድ ስልት እና የደጋፊዎች ተሳትፎ በአንድ መድረክ እየተጣመሩ እንደሚገኙ ያሳያል።

ይሁን እንጂ ተቺዎች ውሳኔው ከባህላዊው የእግር ኳስ መንፈስ ይልቅ ለግብይት እና ለንግድ የተቃኘ ነው ይላሉ። ከ30 የአሸናፊዎች ቀለበቶች በተጨማሪ 1,996 ቀለበቶች ለደጋፊዎች ሽያጭ መዘጋጀታቸው ይህን ክርክር አበርትቶታል።

ይህ አዲስ ባህል በቀጣዮቹ የዓለም ዋንጫዎችም ይቀጥል ወይስ የ2026 ውድድር ብቻ የሚታወስ ልዩ ሙከራ ይሆናል? መልሱን ጊዜና የእግር ኳስ ታሪክ ይሰጡናል።

በቶለሳ መብራቴ