አዲስ ሚዲያ ኔትዎርክ

AMN መስከረም 24 ቀን 2019 ዓ.ም

የኢትዮጵያ መከላከያ ሠራዊት የሃገሪቱን ታሪካዊ አደራ፣ ሉዓላዊነትና የሕዝቦቿን የማይበገር ጽናት በክብርና በድል አስጠብቆ ከትውልድ ወደ ትውልድ የተሸጋገረ የታላቅነት ሕያው ምስክር ነው።

ከቀደሙ አባቶቹ የወረሰውን ጀግንነት በዘመናዊ የቴክኖሎጂና አደረጃጀት ብቃት ያበለጸገው የመከላከያ ሠራዊቱ ፤ የሀገሪቱን ድንበርና የሕዝቦቿን ሰላም በጽናት ከመጠበቅ ባሻገር፣ የኢትዮጵያውያንን ጠንካራ ኅብረ-ብሔራዊነት እና የነፃነት መንፈስ የሚያበስር ታላቅ ሀገራዊ አለኝታ ነው።

የኢትዮጵያ መከላከያ ሠራዊት የአባቶቹን የመከታነትና የጀግንነት ታሪክ ብቻ የሚወርስ ሳይሆን ዛሬም የሀገሪቱን ሉዓላዊነት በጽናት የሚያስቀጥል የሉዓላዊነታችን እና የነፃነታችን ዘብ ነው።

በአሁኑ ወቅት መከላከያ ሠራዊት በሰው ኃይል ብቃት ብቻ ሳይሆን በወታደራዊ ቴክኖሎጂ እና በሀገር በቀል ኢንዱስትሪዎች ዕድገት ረገድ ታላቅ መዋቅራዊ ሽግግር እያደረገ ይገኛል።

እንደ ሆሚቾ ተተኳሽ ማምረቻ እና ስካይዋርድ ኤሮኖቲክስ ባሉ ሀገር በቀል ተቋማት አማካኝነት ሰው አልባ አውሮፕላኖችን በሀገር ውስጥ የማምረት፣ የከባድ መሣሪያዎችንና ታንኮችን በሪቨርስ ምህንድስና የማደስ እና የማሻሻል አቅም አጎልብቷል።

ከዚህም ባሻገር ከሰው ሠራሽ አስተውሎት እና ከሳይበር ደኅንነት ጋር የተደረጉ ዘመናዊ ትስስሮች ሠራዊቱ የዘመኑን ወታደራዊ ሥጋቶች በራሱ አቅም እና ዕውቀት በብቃት ለመመከት የሚያስችለውን ስትራቴጂያዊ አቅም አጎናጽፈውታል።

ይህ የዘመነ አቅሙ ሀገርን ከውስጥና ከውጭ ስጋቶች ከመጠበቅ ባሻገር፣ በአፍሪካ ኅብረት የሰላም ማስከበር ተልዕኮዎች በመሳተፍ ለቀጣናዊ መረጋጋትና ለኢትዮጵያ አህጉራዊ ተጽዕኖ ፈጣሪነት ከፍተኛ አስተዋጽኦ እያበረከተ ይገኛል።

በአጠቃላይ የኢትዮጵያ መከላከያ ሠራዊት በታሪክ ውጣ ውረዶች የተፈተነ፣ በዘመናዊ ሳይንስና ቴክኖሎጂ የጎለበተ እንዲሁም በራሱ አቅም የመቆም አርማን የተጎናጸፈ ተቋም ነው።

ሠራዊቱ ቴክኖሎጂን ከጀግንነት፣ ሙያዊ ብቃትን ከሀገር ፍቅር ጋር አጣጥሞ በመያዝ የኢትዮጵያን ዘላቂ ሰላም እና ልማት የሚያረጋግጥ የሀገራችን ሕያው ጋሻ ሆኖ እያገለገለ ይገኛል።- የሃገር መከላከያ ሰራዊት ኦንላይን ሚዲያ