Finfinneen Giddu gala Konfiraansii Tuurizimii ta’aa jirti jechuun ogeessi diinagdee Guutuu Teessoo (Dr.) dubbatan.
Dr. Guutuun AMN Digital waliin turtii taasisaniin, jijjiiramni magaalaa Finfinnee keessatti gama maraan mul’achaa jiraachuu kan himan ogeessi diinagdee kun hoteelonni ammayyaa saffisaan babal’achuu, bakkeewwan yaa’iiwwam sadarkaa addunyaatti adeemsifaman babal’achuufi hawwata tuurizimii ishee irratti hojiileen fooyya’iinsaa hojjatamuun sababoota Finfinneen akka giddu gala taatu taasisaa jiran keessaa akka ta’an ibsanii jiru.
Magaalota gurguddoo addunyaa irratti adda durummaan konfiransii tuurizimiif filatamoo ta’an akka Baankok, Dubaayi, Niiw Yoork, Afrikaa keessattillee kan akka Johaannesbarg fi Naayiroobii eeranii jiru.
Damee tajaajilaa keessaamaa galiin harki guddaan tuurizimii konfiraansii fi hojiiwwan kanaan walqabatan irraa akka argamu dubbataniiru.
Lakkoofsi namoota gara magaalota gurguddoo addunyaa kanaa deeman waggaa waggaadhaan dabalaa akka jirullee ibsanii jiru.
Finfinneen, teessoo Gamtaa Afrikaa fi magaalota Afrikaa guddachaa jiran keessaa tokko ta’uu isheetiin konfiraansiin turizimii magaalota lafee dugdaa dinagdee itti ta’e keessaa ishee adda duree ta’uuf akka deemtus itti dabaluun ibsaniiru.
Sektarootni tajaajila kennan kanneen hojii aadaa, dizaayinii aadaa fi aartii irratti bobba’an, ogeessota bobbocaa, hoteelota, dhiyeessitoota geejjibaa fi daandiiwwan qilleensaa Itiyoophiyaa fayyadamtoota adda durummaan turizimii konfiraansii magaalattii irraa fayyadaman akka ta’an dubbataniiru.
Daandiin Qilleensaa Itiyoophiyaa Afrikaa keessatti daandii qilleensaa maqaa gaarii qabuu fi indaastirii tuurizimii fi aadaa keessummaa simachuu Itoophiyaa beeksisuu keessatti gahee olaanaa akka qabu kaasaniiru.
Waggoota afran shanan darbaniif daandiin qilleensaa Itoophiyaa daandiiwwan qilleensaa Afrikaa fi addunyaa keessaa warra adda duree ta’an keessaa tokko ta’uun filatamuu isaa eeruun kunis daandiin xiyyaaraa Itoophiyaa damee daawwattootaa fi tuurizimii konfiraansii irraa galii guddaa akka argatu taasisuu isaa ibsanii jiru.
Indaastirichi dhiyeessitoota dhugaatii, oomishaalee beeyladaa fi beeyladaan wal qabatan, kuduraalee fi muduraalee akkasumas oomishaalee nyaataa biroof barbaachisaa akka ta’e ibsuun kunis walitti hidhamiinsa bittootaa fi gurgurtootaa indaastiricha keessa jiru akka guddisu himanii jiru.
Faayidaa gama hawaasummaatiin qabu irratti kan dubbatan ogeessi diinagdee kun maqaa gaarii Itoophiyaa ijaaruun lakkoofsi daawwattootaa akka dabaluuf gahee guddaa akka qabu ibsanii jiru.
Itoophiyaan bakkeewwan hawwattoota tuuristii adda ta’anii fi ajaa’ibsiisoo ta’an kan daawwattoota biyya keessaa fi idil-addunyaa hawwatan hedduu akka qabdu ibsuudhaan Tuurizimiin konfiraansii Itoophiyaan biyya saboota, sablammootaafi ummattootni garaa garaa 80 ol ta’an kan afaan, amantii, duudhaafi aadaatiin wal danda’uufi wal kabajuun waliin jiraachuu hawaasa idil-addunyaatti akka beeksisullee akkasuma addeessaniiru.
Ogeessa diinagdee kan ta’an Guutuu Teesssoo (Dr.) Konfiraansiin Tuurizimii faayidaa diinagdee, hawaasummaa, fi siyaasaa qofa osoo hin taane kallattii hundumaan ummata biyyattiif faayidaa olaanaa akka qabu ibsaniiru.
Finfinneen baatii Fulbaanaatti Konfiraansii Idil addunyaa gurguddoo sadii, kan namoonni kuma 25 ol irratti hirmaatan keessummeessiti.
Biraanuu Warqinaatiin
