አዲስ ሚዲያ ኔትዎርክ

AMN- ግንቦት 5/2018 ዓ.ም

የፈረንሳይ አሊያንስ (Alliance Éthiopienne-Française) በኢትዮጵያ ውስጥ የፈረንሳይን ቋንቋ እና ባህል ለማስፋፋት የሚሰራ ታዋቂ ተቋም ነው።

አሊያንስ ኢትዮ-ፍራንሴዝ በኢትዮጵያ ረጅም እና አስደናቂ ታሪክ ካላቸው የውጭ የባህል ተቋማት ቀዳሚው ነው።

አሊያንስ ኢትዮ-ፍራንሴዝ በአዲስ አበባ የተመሰረተው በኢትዮጵያ አቆጣጠር በ1899 ዓ.ም አካባቢ ሲሆን፣ ይህም ተቋሙ በኢትዮጵያ ከአንድ ክፍለ ዘመን በላይ ዕድሜ እንዲኖረው አድርጎታል።

የተቋሙ አጀማመር ከወቅቱ የፖለቲካ እና የዲፕሎማሲ ግንኙነት ጋር ቀጥተኛ ትስስር ያለው ነው፡፡

ተቋሙ የተመሰረተው በዳግማዊ አፄ ምኒልክ ልዩ ፈቃድ እና ድጋፍ ሲሆን፣ በወቅቱ የአዲስ አበባ – ጅቡቲ የምድር ባቡር ግንባታ እየተከናወነ የነበረበት ወቅት ስለነበር፣ ከፈረንሳይ ጋር የነበረው ግንኙነት በጣም ጠንካራ ነበር፤ ይህም ለተቋሙ መመስረት እንደ ትልቅ ምክንያት ይጠቀሳል።

መጀመሪያ ሲቋቋም ዋና ዓላማው የፈረንሳይኛ ቋንቋን ማስተማር ብቻ ሳይሆን፣ በኢትዮጵያ ዘመናዊ ትምህርትን ለማስፋፋት እንደ አንድ ድልድይ ሆኖ እንዲያገለግልም ነበር።

ተቋሙ መጀመሪያ ሥራውን የጀመረው በአሁኑ ፒያሳ አካባቢ ሲሆን፣ እስከ ዛሬ ድረስ በዚያው ታሪካዊ ስፍራ ላይ ይገኛል።

ሥራው 1928-1933 ዓ.ም በጣሊያን ወረራ ወቅት ተቋርጦ የነበረ ቢሆንም፣ ከድል በኋላ ወዲያውኑ በዳግማዊ አፄ ኃይለሥላሴ ድጋፍ በድጋሚ ጀምሯል።

በዓለም ዙሪያ ካሉ ሌሎች “Alliance Française” ተቋማት ለየት የሚያደርገው “Éthiopienne” (ኢትዮጵያዊ) የሚለውን ቃል በስሙ ውስጥ ማካተቱ ሲሆን፣ ይህም በኢትዮጵያ እና በፈረንሳይ መካከል ያለውን ጥልቅ አጋርነት ያሳያል።

በአሁኑ ወቅት አሊያንስ ከቋንቋ ትምህርት ባለፈ የኢትዮጵያ ወጣት የኪነ-ጥበብ ባለሙያዎች ራሳቸውን የሚያስተዋውቁበት፣ የፈጠራ ስራዎቻቸውን ለሕዝብ የሚያቀርቡበት እና ከዓለም አቀፍ ተሞክሮ ጋር የሚገናኙበት ዋነኛ ማዕከል ሆኖ ያገለግላል።

የተቋሙ ዋነኛ ዓላማም በኢትዮጵያ እና በፈረንሳይ መካከል ያለውን የባህል ትስስር ማጠናከር እና ለኢትዮጵያውያን የፈረንሳይን ቋንቋ በቀላሉ እንዲማሩ ዕድል መፍጠር ነው።

ተቋሙ የፈረንሳይኛ ቋንቋ ትምህርት ለጀማሪዎችም ሆነ ለላቁ ተማሪዎች የሚሰጥ ሲሆን፣ በተጨማሪም የፈረንሳይኛ ብቃት ማረጋገጫ የሆኑትን (DELF) እና (DALF) ፈተናዎችን ያዘጋጃል።

በሚያሰናዳቸው የባህል ዝግጅቶችም የሙዚቃ ኮንሰርቶች፣ የሥነ-ጥበብ አውደ ርዕዮች፣ የፊልም ምሽቶች እና የቲያትር ትርኢቶችን ያቀርባል።

በተቋሙ ውስጥ ያለው ቤተ-መጽሐፍት በርካታ የፈረንሳይኛ መጽሐፍት፣ መጽሔቶች እና ዲጂታል ግብዓቶች የሚገኙበት የመረጃ ማዕከል አለው።

ዋናው ማዕከል በአዲስ አበባ ፒያሳ (ቸርችል ጎዳና) አካባቢ የሚገኝ ሲሆን፣ በድሬዳዋ ከተማም ሌላኛው ቅርንጫፍ ይገኛል።

አሊያንስ አሁን ላይ ክላሲክ ከሆኑ የጥበብ ትርኢቶች ባለፈ፣ በዲጂታል አርት እና በቪዥዋል ኢፌክትስ ዙሪያ ለኢትዮጵያውያን ወጣት ባለሙያዎች ዓለም አቀፍ ስልጠናዎችንም ይሰጣል።

ይህም የሀገር ውስጥ የፊልም እና የግራፊክስ ኢንዱስትሪውን አንድ እርምጃ ያራምዳል ተብሎ ይጠበቃል።

ተቋሙ በታሪካዊቷ ፒያሳ እምብርት ላይ የሚገኝ እንደመሆኑ፣ በአካባቢው የተከናወነው የኮሪደር ልማት ለተቋሙ አዲስ ድምቀት ሰጥቶታል።

ጎብኚዎች አሁን ላይ በዘመናዊ መንገድ የተገነቡትን የእግር መንገዶችን ተጠቅመው ወደ አሊያንስ በማምራት፣ በግቢው ውስጥ ባለው ሰላማዊ ካፌ እየተዝናኑ የፈረንሳይን መጽሔቶች ማንበብና የጥበብ ስራዎችን መመልከት ይችላሉ።

በታምራት ቢሻው