አዲስ ሚዲያ ኔትዎርክ

AMN- ነሐሴ 12/2018 ዓ.ም.

የኢትዮጵያ ህዝብ ከፍጥረቱ ጀምሮ ከተፈጥሮ ጋር ተስማምቶ የሚኖር፣ እሴቶቹን ከትውልድ ወደ ትውልድ በቅብብሎሽ የሚያሻግር ባለጸጋ ህዝብ ነው።

ከእነዚህም መካከል ነሐሴ 13 ቀን በድምቀት የሚከበረው የቡሄ በዓል ልዩ ስፍራ አለው።

በዓሉ የክረምቱን ከባድ ቀዝቃዛ ወራት ተቋቁሞ ወደ ብርሃንና ወደ አዲስ ዘመን መሸጋገሩን የሚያበስር ታላቅ ሃይማኖታዊ እና ማህበራዊ ክንውን ነው።

“ቡሄ” የሚለው ቃል በግዕዝ ቋንቋ “በሐ” ከሚለው የተገኘ ሲሆን፣ (መብራት፣ ብርሃን ማለት ነው) ይህም የብርሃንን መገለጥ ያመለክታል።

ሃይማኖታዊ ይዘቱ የኢየሱስ ክርስቶስ በታቦር ተራራ ላይ መለኮታዊ ክብሩን መገለጡን የሚዘክር ሲሆን፣ በወቅታዊ ሁኔታ ደግሞ የክረምት ደመና ተገፈፎ የፀሐይ ብርሃን መታየት የሚጀምርበትን የወቅት መለወጥ ያበስራል።

የቡሄ በዓል ከሃይማኖታዊ ትውስታው ባሻገር ማህበራዊ ትስስርን የሚያጠናክሩ በርካታ ማራኪ ገጽታዎች አሉት፦

ከወዲሁ የወጣቶች እና ህፃናት ረጅም ጅራፍ እየተቀባበሉና እየተኮሱ “ቡሄ በሉ” እያሉ ከቤት ወደ ቤት መዞር የበዓሉ ልዩ ድምቀት ነው።

ይህ ድምፅ የክረምቱን ጭጋጋማና ቀዝቃዛ መንፈስ ሰብሮ የደስታ ስሜት እንዲፈጠር ያደርጋል።

በበዓሉ ዕለት ከስንዴ እና ከተለያዩ እህሎች የሚዘጋጀው ቤተሰቦች በአንድ ላይ ተሰባስበው የሚበሉት እና ለጎረቤት የሚከፋፈለው ሙልሙል ዳቦ የአብሮነት መገለጫ ነው።

በበዓሉ ዋዜማ ምሽት ላይ በየቤቱ እና በጎዳናዎች ላይ ችቦ በመለኮስ ጨለማውን መግፈፍ እና የብርሃንን ድል ማብሰር የጋራ መግባቢያና የደስታ መግለጫ ነው።

ይህ በዓል የክረምቱን ከባድ ጊዜ ተቋቁሞ ወደ ብርሃንና ወደ አዲስ ዘመን መሸጋገሩን የሚያመላክት ውብ የኢትዮጵያ ባህል ሀብት ነው።

ይሁን እንጂ በዘመናዊው ዓለም የቴክኖሎጂ ተፅዕኖ እና የከተሞች መስፋፋት ሳቢያ እንደ ጅራፍ ማስጮህ፣ ችቦ ማብራት እና ወጣቶች እና ታዳጊዎች በየቤቱ እየዞሩ የቡሄ ቸዋታዎችን የመጫወት ባህላዊ ትውፊቶች እየተቀዛቀዙ መጥተዋል።

ስለሆነም ይህንን ታላቅ ማህበራዊ እና ሃይማኖታዊ እሴት የያዘ በዓል ለቀጣዩ ትውልድ እንዲሸጋገር ማድረግ የሁሉንም ዜጋ የጋራ ተሳትፎ የሚጠይቅ ታሪካዊ ኃላፊነት ነው።

በፍሬሕይወት ብርሃኑ