AMN PLUS – Amajjii 29/2018
Kantiibaan Bulchiinsa Magaalaa Finfinnee Adaanech Abeebee Yaa’ii Idilee 2ffaa Bara Hojii 5ffaa Mana Maree Magaalaa Finfinnee irratti argamuun raawwii karoora hojii ji’oota jahan darbanii dhiyeessaniin “Baatiiwwan jahan darban hooggantootniifi hojjettootni tajaajila hawaasaatti guufuu tahan Kuma 3 fi 729 akka gaafataman taheera” jedhaniiru.
Bulchiinsi magaalichaa tajaajila saffiisaafi qulqullina qabu jiraattota magaalaa Finfinneef kennuun aadaa hojii fooyya’een 24/7 hojjechaa jiraachuu kan ibsan Kantiibaa Adaanech kanaafis tajaajilli giddu gala tokkoo ‘Addis Masob’ agarsiiftuu tahuu ibsaniiru.
Aadde Adaanech tajaajilootni garaagaraa 370 teekinooloojiin deeggaramuun itti quufiinsa tajaajilamtootaa % 94.2 gahuu ibsaniiru.
Haata’u malee, carraaqqii bulchiinsi magaalichaa itti quufiinsa tajaajilamtootaa mirkaneessuuf halkaniifi guyyaa hojjetu cinaatti dhiisuun hooggantootni 61, daayirektarootniifi dursitootni garee 126 balleessaa raawwataniif akka itti gaafataman taasifamuu Kantiibaa Adaanech ibsaniiru.
Dabalataanis, hojjettootni Kuma 3 fi 542 tajaajila kennamutti gufuu tahuun balleessaa hojjetaniif kan itti gaafataman ta’uu Kantiibaan Magaalaa Finfinnee raawwii karoora hojii baatiiwwan jahan darbanii dhiyeessaniin ibsaniiru.
Iddoosaa Abdiitiin
